ఆకలి వేసిందని సర్జరీని మధ్యలోనే ఆపేసి ఆపరేషన్ థియేటర్ నుంచి బయటకు వెళ్లి రెండు గంటల తర్వాత మళ్లీ వచ్చి సర్జరీ చేశాడు ఓ డాక్టర్. సర్జరీ తర్వాత కూడా పూర్తిగా నయం కాకపోవడం వల్ల డాక్టర్ కలిసేందుకు వెళ్లినా నిరాకరించాడు. ఈ దారుణ ఘటన ఉత్తర్ప్రదేశ్లోని ఝాన్సీలో జరిగింది. అసలేం జరిగిందంటే?
జిల్లాలోని నవాబాద్ ప్రాంతానికి చెందిన కాజల్ శర్మ అనే బాలిక ఓ రోజు ఇంట్లో ఆకస్మాత్తుగా కింద పడిపోవడంతో ఎడమ మోచేతి ఎముక విరిగిపోయింది. సమీపంలోని ఓ ప్రైవేటు ఆస్పత్రికి తీసుకెళ్లగా.. ఓ ఆర్థోపెడిక్ సర్జన్ ఆ బాలిక చేతికి ఆపరేషన్ చేయాల్సి ఉంటుందని చెప్పాడు. గతేడాది డిసెంబర్ 22న సర్జరీ చేసేందుకు ఆపరేషన్ థియేటర్కు తీసుకెళ్లగా.. సర్జరీ మొదలు పెట్టిన కొద్ది సేపటికే ఆకలిగా ఉందని మసాలా దోశ తిని వచ్చి పూర్తి చేస్తానని చెప్పి మధ్యలోనే వెళ్లిపోయాడు. దాదాపు 2గంటల తర్వాత తిరిగి వచ్చి ఆపరేషన్ను చేశాడు. కానీ సర్జరీ తర్వాత చేతికి నయం కాలేదని, అలాగే వేళ్లు కూడా వంకరగా మారాయని బాలిక మళ్లీ ఆ డాక్టర్ను కలిసేందుకు ఆస్పత్రికి వెళ్లగా.. ఆమెను కలిసేందుకు డాక్టర్ నిరాకరించాడు. ఆ బాలిక మరో ఆస్పత్రిలో చికిత్స చేయించుకోవాల్సి వచ్చింది. ఈ విషయంపై నవాబద్ పోలీస్ స్టేషన్లో డాక్టర్పై ఫిర్యాదు చేసినా ఎలాంటి చర్యలు తీసుకోలేదని బాలిక వాపోయింది.
