కారు చెట్టును ఢీ కొట్టిన ఘటనలో ఒకే కుటుంబంలో ఐదుగురు మరణించారు. ఈ దుర్ఘటన ఉత్తర్ప్రదేశ్లోని హర్డోయ్ జిల్లాలో సోమవారం రాత్రి చోటుచేసుకుంది. మృతుల్లో నాలుగేళ్ల చిన్నారి సహా ఐదుగురు ఉన్నారు. గమనించిన స్థానికులు పోలీసులకు సమాచారం అందించారు. ఘటనాస్థలికి చేరుకున్న పోలీసులు మృతదేహాలను కారులో నుంచి బయటకు తీశారు. వీరంతా బరాకాంత్ నుంచి నయాగావ్ వెళ్తుండగా ప్రమాదం చోటుచేసుకున్నట్లు పోలీసులు వెల్లడించారు.
పోలీసులు తెలిపిన వివరాల ప్రకారం..
హర్డోయ్ జిల్లాలోని ఖమరియా గ్రామంలో బిల్హౌర్-కత్రా హైవేపై ఓ కారు అదుపుతప్పి చెట్టును ఢీ కొట్టింది. ఈ ఘటనలో కారులో ప్రయాణిస్తున్న ఐదుగురు దుర్మరణం చెందారు. కారులో నుంచి మృతదేహాలను వెలికి తీసేందుకు గ్యాస్ కట్టర్లు వినియోగించాం. మృతుల్లో నాలుగేళ్ల చిన్నారి సహా ఐదుగురు ఉన్నారు. బాధితులు బరాకాంత్ గ్రామానికి చెందిన వారు. ఈ ఘటనపై కేసు నమోదు చేసుకున్నాము. ప్రమాదానికి గల పూర్తి కారణాలను ఆరా తీస్తున్నాం. అని హర్డోయ్ జిల్లా పోలీసులు తెలిపారు.
