మీరు ఎక్కాల్సిన రైలు జీవితకాలం ఆలస్యం అనే సామెత తెలిసిందే. చాలా వరకు రైళ్లు ఆలస్యంగానే వస్తాయి. కారణాలేవైనా రైళ్లు ఆలస్యంగా రావడం మాత్రం కామన్. కానీ వాస్కోడిగామా- హజ్రత్‌ నిజాముద్దీన్‌ గోవా ఎక్స్ప్రెస్ మాత్రం 90 నిమిషాలు ముందుగానే వచ్చింది. దీనివల్ల ప్రయాణికులు చాలా ఇబ్బంది పడ్డారు. ఏకంగా 45 మంది ప్రయాణికులను ఎక్కించుకోకుండా వదిలేసి వెళ్లింది గోవా ఎక్స్ప్రెస్.
గురువారం ఉదయం 10.35 గంటలకు ఈ రైలు మహారాష్ట్రలోని మన్మాడ్‌ జంక్షన్‌కు రావాల్సి ఉండగా మళ్లింపు మార్గంలో 9.05కే వచ్చేసింది. అప్పటికి ఇంకా ఆ స్టేషన్‌కు చేరుకోవాల్సినవారు ఉన్నా ఐదు నిమిషాల్లోనే అక్కడి నుంచి బయల్దేరి వెళ్లిపోయింది. ఆ స్టేషన్లో 45 మంది ఆ రైలును అందుకోవాల్సి ఉంది. 9.45-10 గంటల సమయంలో స్టేషన్‌కు వచ్చిన ఆ ప్రయాణికులు అసలు విషయం తెలిసి షాక్ అయ్యారు. తమకు ప్రత్యామ్నాయ ఏర్పాట్లు చేయాలంటూ స్టేషన్‌ మేనేజర్‌ కార్యాలయం వద్ద ఆందోళన నిర్వహించారు. అధికారులు వీరి కోసం గీతాంజలి ఎక్స్‌ప్రెస్‌ను మన్మాడ్‌లో నిలుపుచేయించి, దానిలో జల్గావ్‌కు పంపించారు.
