ఝార్ఖండ్ ప్రజలకు ఆ రాష్ట్ర ప్రభుత్వం శుభవార్త చెప్పింది. ప్రస్తుతం ఉన్న రిజర్వేషన్లన కోటాను 17 శాతం పెంచుతూ నిర్ణయించారు. ఇవాళ ఆ రాష్ట్ర అసెంబ్లీ సమావేశంలో ఆ బిల్లుకు ఆమోదం కూడా తెలిపారు. ఫలితంగా ఎస్సీ, ఎస్టీ, ఈబీసీ, ఓబీసీలకు ప్రభుత్వ ఉద్యోగాల్లో ప్రస్తుతం ఉన్న 60 శాత రిజర్వేషన్‌లను మరో 17 శాతం పెంచారు. 2001 నాటి రిజర్వేషన్ చట్టాన్ని సవరిస్తూ.. రాజ్యాంగంలోని తొమ్మిదో షెడ్యూల్‌లో మార్పులు చేయాలని కేంద్రాన్ని కోరనున్నట్లు ఈ బిల్లులో పేర్కొన్నారు.
ప్రస్తుతం ఝార్ఖండ్లో ఎస్టీలకు 26శాతం, ఎస్సీలకు 10శాతం రిజర్వేషన్ ఉంది. ఓబీసీల కోటా 14శాతంగా ఉండగా.. పెంచుతామని 2019 ఎన్నికల సమయంలో అన్ని ప్రధాన పార్టీలు హామీ ఇచ్చాయి. ఇప్పుడు హేమంత్ సోరెన్ తెచ్చిన బిల్లుతో ఎస్సీలకు 12 శాతం, ఎస్టీలకు 28 శాతం, ఈబీసీలకు 15 శాతం, ఓబీసీలకు 12 శాతం రిజర్వేషన్ ఉండనుంది.
ఇదే క్రమంలో మరో బిల్లును కూడా ఝార్ఖండ్ శాసనసభ ఆమోదించింది. ప్రజల నివాస స్థితిని నిర్ణయించేందుకు 1932 భూ రికార్డులను ఉపయోగించాలని ప్రతిపాదించిన ఆ బిల్లును అసెంబ్లీలో ఆమోదించారు.
