పశ్చిమ బెంగాల్లో ఉద్రిక్త పరిస్థితులు నెలకొన్నాయి. జాతీయ దర్యాప్తు సంస్థ (NIA) వాహనంపై దాడి కలకలం రేపింది. 2022 బాంబు పేలుడు కేసులో దర్యాప్తు కోసం వెళ్లిన ఎన్ఐఏ అధికారుల వాహనాన్ని స్థానికులు చట్టుముట్టి రాళ్లతో దాడి చేశారు. ఈ కేసుకు సంబంధించిన ఇద్దరు వ్యక్తులను అరెస్టు చేసి కోల్కతాకు తిరిగి వెళుతుండగా పుర్బా మేదినీపుర్ జిల్లాలోని భూపతినగర్ ప్రాంతంలో ఇవాళ ఈ ఘటన జరిగిందని పోలీసులు తెలిపారు.
ఈ ఘటనలో తమ అధికారి ఒకరు గాయపడ్డారని ఎన్ఐఏ తెలిపినట్లు ఓ సీనియర్ పోలీసు ఆఫీసర్ వెల్లడించారు. దీనిపై ఎన్ఐఏ పోలీసులకు ఫిర్యాదు చేసిందని తెలిపారు. మరోవైపు ఈ ఘటనతో కేంద్రం అప్రమత్తమైంది. అరెస్టు చేసిన వ్యక్తులతో, ఎన్ఐఏ అధికారులు ఉన్న భూపతినగర్కు భారీగా కేంద్ర బలగాలు చేరుకున్నాయి. 2022 డిసెంబర్ 3వ తేదీన భూపతినగర్లో జరిగిన పేలుడులో ముగ్గురు వ్యక్తులు మరణించగా.. ఈ కేసు దర్యాప్తును ఎన్ఐఏకు అప్పగించారు. మరోవైపు, రేషన్ కుంభకోణానికి సంబంధించి జనవరిలో ఉత్తర 24పరగణాల జిల్లాలోని సందేశ్ఖాలీ ప్రాంతంలో దర్యాప్తు కోసం వెళ్లిన ఈడీ అధికారులపై కొందరు దుండగులు దాడి చేశారు.
