బిహార్‌కు ప్రత్యేక హోదా లేదా ప్రత్యేక ఆర్థిక ప్యాకేజీ ప్రకటించాలని కేంద్రాన్ని జనతాదళ్‌ (యునైటెడ్‌) డిమాండ్‌ చేసింది. పేరు ఏదైనా తమ రాష్ట్రానికి సాయం కావాలని విజ్ఞప్తి చేసింది. శనివారం జరిగిన పార్టీ జాతీయ కార్యవర్గ సమావేశంలో ఈ మేరకు తీర్మానం చేసింది. బిహార్‌కు ప్రత్యేక హోదా కోసం సీఎం నీతీశ్ కుమార్ చాన్నాళ్ల నుంచి డిమాండ్‌ చేస్తున్న విషయం తెలిసిందే. అయితే ఎన్డీయే ప్రభుత్వంలో భాగస్వామిగా చేరిన తర్వాత ఇప్పుడు ఆ స్వరంలో మార్పు రావడం గమనార్హం.
మరోవైపు ధరల పెరుగుదల, నిరుద్యోగం తదితర అంశాలపైనా ఈ సమావేశంలో జేడీయూ తీర్మానాలు చేసింది. పేపర్ లీకేజీ కేసుల్లో నిందితులకు కఠిన శిక్ష విధించాలని డిమాండ్‌ చేస్తూ. పరీక్షల్లో అక్రమాలను నివారించేందుకు పార్లమెంట్‌లో కఠినచట్టం చేయాలని కోరింది. బిహార్‌ సీఎం నీతీశ్ కుమార్ నేతృత్వంలో జరిగిన ఈ సమావేశంలో పార్టీ కార్యనిర్వాహక అధ్యక్షుడిగా రాజ్యసభ ఎంపీ సంజయ్‌ కుమార్ ఝా ఎంపికయ్యారు. గతంలో ఝా.. బీజేపీలో పనిచేశారు. ఇండియా కూటమితో సంబంధాలు తెంచుకొని బీజేపీతో జేడీయూ జతకట్టడం వెనక కూడా ఝా కీలకపాత్ర పోషించారు.
