ఈరోజు మధ్యాహ్నం 3 గంటలకు హైదరాబాద్ ఉప్పల్ స్టేడియంలో సన్రైజర్స్ హైదరాబాద్ – పంజాబ్‌ కింగ్స్ మధ్య మ్యాచ్ జరగనుంది. ఈ నేపథ్యంలో ఆ మార్గంలో ట్రాఫిక్ ఆంక్షలు ఉంటాయని రాచకొండ సీపీ తరుణ్‌జోషి వెల్లడించారు. మధ్యాహ్నం 1 గంట నుంచి రాత్రి 10:30 గంటల వరకు ఆంక్షలు అమల్లో ఉండనున్నట్లు తెలిపారు. చెంగిచెర్ల, బోడుప్పల్, పీర్జాదిగూడ నుంచి ఉప్పల్ వచ్చే వాహనాలు భగాయత్‌ రోడ్డువైపు మళ్లిస్తామని పేర్కొన్న తరుణ్ జోషి.. వాహనదారులు ఈ విషయాన్ని గమనించి ట్రాఫిక్ పోలీసులకు సహకరించాలని కోరారు.
ఐపీఎల్ 2024లో సన్రైజర్స్ తన చివరి మ్యాచ్‌ను ఈరోజు పంజాబ్‌ కింగ్స్తో ఆడనుంది. ఈ మ్యాచ్‌లో ఎస్ఆర్హెచ్ గెలిస్తే పాయింట్ల పట్టికలో 17 పాయింట్లతో రెండో స్థానానికి చేరే అవకాశం ఉంటుంది. కానీ ఇది జరగాలంటే కోల్‌కతా నైట్ రైడర్స్తో జరిగే తమ చివరి మ్యాచ్‌లో రాజస్థాన్‌ రాయల్స్ ఓడిపోవాల్సి ఉంటుంది. అప్పుడు రాజస్థాన్‌ 16 పాయింట్లతో మూడో స్థానంలో, 17 పాయింట్లతో హైదరాబాద్ రెండో పొజిషన్లో కొనసాగుతాయి.
