కరోనా కట్టడికి దేశవ్యాప్తంగా విధించబడిన లాక్‌డౌన్‌ 5.0 జూన్‌ 30వ తేదీతో ముగుస్తుందన్న విషయం తెలిసిందే. అయితే ఇప్పటికే కేంద్రం అనేక కార్యకలాపాలకు ఆంక్షలను సడలించింది. ఈ క్రమంలో జూన్‌ 8వ తేదీ నుంచి మరిన్ని ఆంక్షలను సడలించనున్నారు. అటు ఆధ్యాత్మిక ప్రదేశాలతోపాటు, ఇటు మాల్స్, హోటల్స్, రెస్టారెంట్లను ఓపెన్‌ చేయనున్నారు. ఈ నేపథ్యంలో తెలంగాణ ప్రభుత్వం ప్రజలకు పలు ముఖ్యమైన సూచనలు జారీ చేసింది.
* హోటళ్లు, రెస్టారెంట్లు, మాల్స్, దేవాలయాల్లో శానిటైజర్లు, థర్మల్‌ స్క్రీనింగ్‌ చేయాలి.
* లోపలికి వెళ్లేందుకు ఒక మార్గం, బయటకు వచ్చేందుకు మరొక మార్గంను ఏర్పాటు చేయాలి.
* లిఫ్టుల్లో, ఎస్కలేటర్లపై, లోపలి ప్రదేశాల్లో భౌతిక దూరం పాటించడం తప్పనిసరి.
* హోటల్‌కు వచ్చే అతిథుల పూర్తి వివరాలు సేకరించాలి. వారి ఆరోగ్య స్థితిపై వారు ఇచ్చే స్వీయ ధ్రువీకరణ పత్రాన్ని తీసుకోవాలి.
* రెస్టారెంట్లలో టేబుల్స్‌ మధ్య భౌతిక దూరం ఉండాలి.
* ఏసీ 24 నుంచి 30 డిగ్రీల మధ్య ఉంచాలి. మాల్స్‌లో చిన్నారులను ఆడుకునే స్థలాలను మూసి ఉంచాలి.
* రెస్టారెంట్ల వారు వినియోగదారులను ఆహార పార్శిళ్లు తీసుకు వెళ్లేవిధంగా ప్రోత్సహించాలి. అలాగే రెస్టారెంట్‌లో సీటింగ్‌ కెపాసిటీలో ఎప్పుడూ 50 శాతానికి కస్టమర్లు మించరాదు.
* కంటెయిన్మెంట్‌ జోన్లలో ఉన్నవారు బయటకు రాకూడదు.
* ఇండ్ల నుంచి పనిచేసే వారిని ప్రోత్సహించాలి. దాన్ని సెలవుగా పరిగణించరాదు.
* ఆఫీసుల్లో పనివేళలు దశలవారీగా ఉండాలి.
* వాహనాలను శానిటైజేషన్‌ చేసుకోవాలి.
* కార్యాలయాల్లో పనిచేసే చోట ఒకటి రెండు కరోనా కేసులు నమోదైతే ఆఫీసులను శుభ్రం చేయాలి. తరువాతే ఉద్యోగులను అనుమతించాలి. అదే కేసులు ఎక్కువగా నమోదైతే ఆఫీసును మూసేయాలి. మళ్లీ అనుమతి ఇచ్చే వరకు ఆఫీసులను తెరవకూడదు.
