తెలంగాణ విద్యార్థులకు అలర్ట్. ప్రభుత్వ, ప్రైవేట్‌ ఇంజినీరింగ్‌ కళాశాలల్లో బీటెక్‌/బీఈ సీట్ల భర్తీకి నిర్వహించాల్సిన కౌన్సెలింగ్ షెడ్యూల్‌లో మార్పులు చోటుచేసుకున్నాయి. తొలుత జూన్‌ 27వ తేదీ నుంచి కౌన్సెలింగ్ ప్రక్రియ ప్రారంభం కానున్నట్లు అధికారులు ప్రకటించారు. కానీ తాజాగా ఈ కౌన్సెలింగ్ ప్రక్రియ షెడ్యూల్‌ వాయిదా పడింది.
జులై 4వ తేదీ నుంచి ఇంజినీరింగ్‌ తొలి విడత ప్రవేశ ప్రక్రియ ప్రారంభం కానున్నట్లు అధికారులు తెలిపారు. జులై 6 నుంచి 13వ తేదీ వరకు తొలి విడత సర్టిఫికెట్‌ వెరిఫికేషన్‌, 8వ తేదీ నుంచి 15వ తేదీ వరకు తొలి విడత వెబ్‌ ఆప్షన్లు, జులై 19న ఇంజినీరింగ్‌ తొలి విడత సీట్ల కేటాయించనున్నట్లు అధికారులు వెల్లడించారు.
జులై 26 నుంచి ఇంజినీరింగ్‌ రెండో విడత కౌన్సెలింగ్ నిర్వహించి.. జులై 27న రెండో విడత కౌన్సెలింగ్ సర్టిఫికెట్ల వెరిఫికేషన్‌, 27, 28 తేదీల్లో రెండో విడత వెబ్‌ ఆప్షన్లు, 31న ఇంజినీరింగ్‌ రెండో విడత సీట్ల కేటాయింపు పూర్తి చేసి ఆ తర్వాత ఆగస్టు 8 నుంచి మూడో విడత కౌన్సెలింగ్ ప్రక్రియ ప్రారంభిస్తారు. ఆగస్టు 9న సర్టిఫికెట్‌ వెరిఫికేషన్‌, 9, 10 తేదీల్లో వెబ్‌ ఆప్షన్లు, 13న ఇంజినీరింగ్‌ మూడో విడత సీట్ల కేటాయింపు నిర్వహిస్తారు. ఆగస్టు 21 నుంచి కన్వీనర్‌ కోటా ఇంటర్నల్‌ స్లైడింగ్‌కు అవకాశం ఇస్తారు.
