హైదరాబాద్లో ఆదివారం రోజున ఈదురు గాలులతో కూడిన భారీ వర్షానికి నగరం అతలాకుతలం అయిన విషయం తెలిసిందే. ముఖ్యంగా గాలి వాన బీభత్సానికి పలువురు ప్రాణాలు కూడా కోల్పోయారు. భారీ వర్షానికి నగరంలోకి శేరిలింగంపల్లి నియోజకవర్గం హాఫీజ్‌పేట్లో చనిపోయిన రెండు కుటుంబాలను బీఆర్ఎస్ కార్యనిర్వాహక అధ్యక్షుడు కేటీఆర్ పరామర్శించారు. బాధిత కుటుంబాలకు లక్ష రూపాయల సాయన్ని అందించారు.
ఆదివారం రోజున నగరంలో విపరీతంగా గాలి దుమారంతో కూడిన వర్షం కురవడంతో కాంపౌండ్ వాల్ కూలి 51 ఏళ్ల అడ్వొకేట్ చనిపోగా రేకులపై ఉన్న రాయి మీద పడి 6 ఏళ్ల బాలుడు మృతి చెందాడు. నిన్న కురిసిన వర్షానికి రాష్ట్ర వ్యాప్తంగా 14 మంది చనిపోయారని, వర్షాకాలం రాకముందే ప్రభుత్వం తగు జాగ్రత్తలు తీసుకొని ఇలాంటి ఘటనలు జరగకుండా చూడాలని కేటీఆర్ ప్రభుత్వాన్ని కోరారు. గత ప్రభుత్వం నిర్మించిన డబుల్ బెడ్రూం ఇళ్లను నిర్వాసితులకు ఇవ్వాలని డిమాండ్ చేశారు. బాధితులను వెంటనే జీహెచ్ఎంసీ షెల్టర్లకు తరలించాలని ప్రభుత్వానికి విజ్ఞప్తి చేశారు.
