ఏపీ రహదారుల గురించి చాలా కాలంగా చర్చ జరుగుతున్న విషయం తెలిసిందే. అయితే ఈసారి ఆ సమస్య తెలంగాణకు అంటుకుంది. ఏకంగా రాష్ట్ర మంత్రి తుమ్మల నాగేశ్వరరావు ఏపీ రహదారుల స్థితిపై స్పందించారు. స్పందించడమే కాదు ఆ విషయంపై అక్కడి అధికారులతో మాట్లాడారు. ఈ రోడ్లు చూసి జనాలు ఓట్ల ఎలా వేస్తారని ప్రశ్నించారు. ఇంతకీ ఏం జరిగిందంటే..?
మంత్రి తుమ్మల బుధవారం రోజున భద్రాచలం నుంచి దుమ్ముగూడెం వెళ్తూ రెండు రాష్ట్రాల సరిహద్దుల్లోని అల్లూరి సీతారామరాజు జిల్లా ఎటపాక- కన్నాయిగూడెం రహదారిలో ప్రయాణించారు. ఎటపాక, చింతలగూడెం, కన్నాయిగూడెం ప్రాంతాల్లో పెద్దపెద్ద గుంతలు ఉండటంతో అసహనం వ్యక్తం చేసిన తుమ్మల.. అక్కడి నుంచే ఏపీ ఆర్‌అండ్‌బీ సీఈ శ్రీనివాసరెడ్డితో ఫోన్‌లో మాట్లాడారు.
‘ఎటపాక- కన్నాయిగూడెం మధ్యలో ఆర్‌అండ్‌బీ రోడ్డు నిండా గోతులే ఉన్నాయి. రాష్ట్ర విభజన తర్వాత తెలంగాణ ఆర్‌అండ్‌బీ మంత్రిగా పని చేశాను. దుమ్ముగూడెం- చర్ల రోడ్డు పనులు చేయిస్తున్నప్పుడే ఎటపాక నుంచి కన్నాయిగూడెం గ్రామాల మధ్య ఈ 8 కి.మీ. దూరం రోడ్డు వేయించాను. ఆ తర్వాత కనీసం మరమ్మతులు చేయించలేదు. ఈ రోడ్డు ఇట్లా ఉంటే మీ ప్రభుత్వానికే ఓట్లు పడవు. మీరు చేయలేకపోతే మేమే ప్యాచ్‌ వర్క్స్‌ చేయిస్తామ’ని అన్నారు. మంత్రి ఫోన్‌కాల్‌పై స్పందించిన సీఈ శ్రీనివాసరెడ్డి.. త్వరలో మరమ్మతులు చేస్తామని చెప్పారు.
