కాకతీయ విశ్వవిద్యాలయంలో పీహెచ్డీ ప్రవేశాల రగడ ఇంకా కొనసాగుతూనే ఉంది. పీహెచ్డీ ప్రవేశాల్లో అక్రమాలపై నిరసన తెలుపుతున్న విద్యార్థులపై పోలీసులు జులుం చేశారని ఆరోపిస్తూ ఆరు రోజులుగా విద్యార్థులు ఆందోళన చేస్తున్నారు. ఈ క్రమంలోనే ఇవాళ కేయూ బంద్తో పాటు వరంగల్ బంద్కు విద్యార్థి సంఘాల నేతలు పిలుపునిచ్చారు.
విద్యార్థులపై దాడిని నిరసిస్తూ కాకతీయ విశ్వవిద్యాలయం విద్యార్థి ఐకాస బంద్ నేపథ్యంలో పోలీసులు భారీ బందోబస్తును ఏర్పాటు చేశారు. ఎంజీఎం కూడలి, వరంగల్- హనుమకొండ ప్రధాన కూడళ్ల వద్ద పోలీసుల పహారా చేపట్టారు. కాకతీయ విశ్వవిద్యాలయం నుంచి విద్యార్థి సంఘాలు బైకు ర్యాలీ చేపట్టారు. ఈ నేపథ్యంలో కేయూ దూరవిద్య కేంద్ర వద్ద పోలీసులు భారీగా మోహరించి… విద్యార్థులు చేపట్టిన ర్యాలీని అడ్డుకున్నారు.
ఈ క్రమంలో పోలీసులకు విద్యార్థి సంఘ నాయకులకు వాగ్వాదం చోటుచేసుకుంది. అంతకు ముందు విశ్వవిద్యాలయం వద్ద పలు ప్రైవేట్ విద్యాసంస్థల బస్సులను విద్యార్థి సంఘాల నాయకులు అడ్డుకున్నారు. బస్సుల నుంచి విద్యార్థులను దించివేసి బంద్కు సహకరించాలని కోరారు.
