బీఆర్ఎస్ సీనియర్ నేత, మాజీ మంత్రి తుమ్మల నాగేశ్వర రావు రాజకీయ ప్రయాణం ఎటువైపు సాగుతుందని ప్రస్తుతం రాజకీయ వర్గాల్లో ఉత్కంఠ రేగుతోంది. మరోవైపు ఆయన నిర్ణయం గురించి అభిమానులు, కార్యకర్తలు ఆత్రుతగా ఎదురుచూస్తున్నారు. కచ్చితంగా ఆయన కారు దిగి…హస్తం గూటికి చేరతారనే వాదనలు బలంగా వినిపిస్తున్నాయి. తాజాగా తుమ్మల ఇంటికి.. కాంగ్రెస్ ప్రచార కమిటీ కోర్ ఛైర్మన్ పొంగులేటి శ్రీనివాస్ రావడంపై మరింత ఉత్కంఠ సంతరించుకుంది.
తుమ్మలకు బీఆర్ఎస్ టికెట్ నిరాకరించడంతో… కాంగ్రెస్ తనను ఆహ్వానించిందని ఇప్పటికే చెప్పిన ఆయన…కాంగ్రెస్లో చేరతారా లేదా అనే అంశంపై రాజకీయ వేడి రాజుకుంది. అనుచరులు, అభిమానులతో చర్చించాక నిర్ణయాన్ని వెల్లడిస్తానని తుమ్మల పునరుద్ఘాటించారు. ఈ నేపథ్యంలో ఆయన ఏ నిర్ణయం తీసుకుంటారా అని..అనుచరులు ఆయన ఇంటి వద్దకు భారీగా తరలివచ్చారు. పొంగులేటి రాకతో తుమ్మల కచ్చితంగా కాంగ్రెస్లో చేరతారనే అందరూ అనుకుంటున్నారు. మరి తుమ్మల నాగేశ్వర రావు నిర్ణయమేంటో తెలియాలంటే ఇంకొన్ని రోజులు ఆగాల్సిందేనని రాజకీయ వర్గాలు చెబుతున్నాయి.