8 నెలల క్రితం రిటైర్డ్ అయి బెనిఫిట్స్ రాక ఆత్మహత్యకు సిద్దమైన రిటైర్డ్ ఎఎస్ఐకి ఎట్టకేలకు బెనిఫిట్స్ అందాయి. రిటైర్ అయి ఎనిమిది నెలలు అవుతున్నా ఇప్పటివరకు రిటైర్మెంట్ ప్రయోజనాలు రావడం లేదని ఇక తనకు ఆత్మహత్యే శరణ్యమని మహబూబ్ నగర్ జిల్లా భూత్పూర్‌కి చెందిన రిటైర్డ్ ఏఆర్ ఎఎస్ఐ ఎండీ సాదిక్ మాట్లాడిన వీడియో వైరల్ అయిన విషయం తెలిసిందే. దీంతో స్పందించిన ప్రభుత్వం అతనికి సంబంధించిన అన్ని రకాల ప్రయోజనాలను విడుదల చేసింది.
దాదాపు అతనికి రావలసిన రూ. 52 లక్షల బెనిఫిట్స్ విడుదల చేసింది ప్రభుత్వం. అయితే 2024 మార్చి నుంచి ఉమ్మడి పాలమూరులో రిటైర్డ్ అయిన వారు వందలాది సంఖ్యలో ఉన్నారు. వీరెవరికీ ఇప్పటివరకు రిటైర్మెంట్ ప్రయోజనాలు అందకపోవడంతో.. వీరందరూ ఉద్యోగ విరమణ ప్రయోజనాల కోసం ఎదురు చూస్తున్నారు. తమకూ కూడా వెంటనే ప్రభుత్వం అన్ని ప్రయోజనాలు విడుదల చేయాలని కోరుతున్నారు.
