మేడ్చల్ సీఎంఆర్ కాలేజీ లేడీస్ హాస్టల్ బాత్ రూమ్ లో రహస్యంగా వీడియోలు తీస్తున్నారంటూ బుధవారం రాత్రి విద్యార్థినిలు ఆందోళనకు దిగారు. హాస్టల్ సిబ్బందిపై చర్యలు తీసుకోవాలంటూ డిమాండ్ చేశారు. దీంతో పోలీసులు ఆందోళన కారులతో మాట్లాడారు. అనంతరం ఆందోళనను విరమించారు. ఘటనపై కేసు నమోదు చేసి దర్యాప్తు చేశారు. హాస్టల్ కిటికీ వద్ద చేతి వేళ్ళు గుర్తించి ఐదుగురిని అదుపులోకి తీసుకొని పోలీసులు విచారిస్తున్నారు. వారి నుంచి సెల్ ఫోన్లను తీసుకుని పరిశీలిస్తున్నారు.
ఇది ఇలా ఉంటే మరోవైపు ఇవాళ ఉదయం నుంచి కూడా విద్యార్థులు ఆందోళనకు దిగారు. వీరికి తల్లిదండ్రులు, విద్యార్థి సంఘాల నాయకులు మద్దతుగా కాలేజీ ఎదుట ధర్నా నిర్వహించారు. హాస్టల్ సిబ్బందిపై చర్యలు తీసుకోవాలని డిమాండ్ చేశారు. ఈ క్రమంలో కాలేజీ సెక్యూరిటీ, విద్యార్థుల మధ్య వాగ్వాదం జరిగింది. కాలేజీ గేట్లు బంద్ చేయడంతో విద్యార్థులు ఆగ్రహం వ్యక్తం చేశారు గేట్లు బద్దలు కొట్టుకొని కాలేజీలోకి వెళ్లి నిరసన వ్యక్తం చేశారు. కాలేజీ ఎదుట బైఠాయించి కాలేజీ యాజమాన్యం, సిబ్బందికి వ్యతిరేకంగా నినాదాలు చేశారు. ఈ ఘటనతో కాలేజీ ప్రాంగణం దద్దరిల్లిపోయింది. దీంతో కాలేజీ యాజమాన్యం, అధికారులు దిగొచ్చారు. హాస్టల్ వార్డెన్ పై సస్పెన్షన్ వేటు వేశారు. అయినా విద్యార్థులు ఆందోళనను కొనసాగిస్తున్నారు. కాలేజీలో విద్యార్థులకు భద్రత లేకుండా పోయిందని ఆవేదన వ్యక్తం చేస్తున్నారు.
