తెలంగాణ సర్కార్ ప్రవేశపెట్టిన మహాలక్ష్మి పథకం కింద మహిళలకు ఉచిత ప్రయాణ సదుపాయం కల్పిస్తున్న విషయం తెలిసిందే. ఈ పథకానికి భారీగా ఆదరణ లభిస్తోంది. ఈ నేపథ్యంలోనే ఆర్టీసీ బస్సుల్లో రద్దీ బాగా పెరుగుతోంది. బస్సులు సరిపోకపోవడంతో మరికొన్ని రోజుల్లో ఇంకొన్ని బస్సులను ఏర్పాటు చేస్తామని ఇటీవలే ఆర్టీసీ ఎండీ సజ్జనార్ ప్రకటించారు.
అయితే తమ డిపోలో 97 శాతం, 100 శాతం ఆక్యుపెన్సీ రేషియో(ఓఆర్- సీట్ల భర్తీ నిష్పత్తి) నమోదవుతోందని కొందరు డిపో మేనేజర్లు ఇస్తున్న నివేదికలపై ఉన్నతాధికారులు అనుమానం వ్యక్తం చేస్తున్నారు. ఒక్కసారిగా ఓఆర్ ఎలా పెరిగిందని సందేహిస్తున్నారు. ఈ నేపథ్యంలోనే మహిళలకు జారీచేసే ‘జీరో’ టికెట్లపై తనిఖీలు నిర్వహించాలని ఆదేశాలు జారీ చేశారు.
కొందరు కండక్టర్లు బస్సుల్లో ప్రయాణిస్తున్న మహిళలకంటే ఎక్కువగా సంఖ్యలో ‘జీరో’ టికెట్లు ప్రింట్‌ చేస్తున్నారన్న ఆరోపణలు వస్తున్నాయి. ఈ నేపథ్యంలో ‘జీరో’ టికెట్ల జారీ విషయమై తనిఖీలు చేయాలని ఆర్టీసీ యాజమాన్యం నిర్ణయించి కొన్ని జిల్లాల్లోని రూట్లలో శనివారమే తనిఖీలు ప్రారంభించింది. హైదరాబాద్‌ సిటీ బస్సుల్లోనూ రెండు, మూడు రోజుల్లో తనిఖీలు నిర్వహించేందుకు అధికారులు రంగం సిద్ధం చేస్తున్నారు.
