ఈ రోజు దేశ వ్యాప్తంగా వైద్య సేవలు నిలిచిపోనున్నాయి. ఈ మేరకు అఖిల భారత వైద్య సంఘం పిలుపునిచ్చింది. ఢిల్లీతో పాటు ఇతర రాష్ట్రాల్లో రెసిడెంట్ వైద్యులు నీట్ పీజీ కౌన్సిలింగ్ ను వెంటనే నిర్వహించాలంటూ నెల రోజులుగా ఆందోళన చేస్తున్నారు. ఈ నేపథ్యంలోనే రెసిడెంట్ వైద్యులు నిన్న ఢిల్లీలోని మౌలాన ఆజాద్ మెడికల్ హాస్పిటల్ నుండి సుప్రీం కోర్టు వరకు ర్యాలీగా వెళ్లి నిరసన వ్యక్తం చేయాలని నిర్ణయించుకున్నారు. అయితే ఈ నిరసనను పోలీసులు అడ్డుకుని రెసిడెంట్ వైద్యులపై లాఠీఛార్జ్ చేసి వారిని చెదరగొట్టారు.
తమపై లాఠీఛార్జ్ చేయడాన్ని అఖిలభారత వైద్య సంఘం తీవ్రంగా పరిగణించింది. దాంతో నేడు దేశ వ్యాప్తంగా వైద్య సేవలు నిలిపివేయాలని రెసిడెంట్ వైద్యులకు పిలుపునిచ్చింది. అంతేకాకుండా ఈరోజు ఉదయం 8 గంటల నుండి విధులకు దూరంగా ఉండాలంటూ వెల్లడించింది. శాంతియుతంగా నిరసన తెలుపుతున్న రెసిడెంట్ వైద్యులపై లాఠీఛార్జ్ చేయడాన్ని ఫెడరేషన్ ఆఫ్ డాక్టర్స్ అసోసియేషన్ కూడా ఖండించింది. మంగళవారం బ్లాక్ డే అంటూ ప్రకటించింది.
