హర్యానాలో విషాద ఘటన చోటు చేసుకుంది. గురుగ్రామ్‌లోని అరావలి కొండల్లో ఇటీవల అక్రమ మైనింగ్ జరుగుతున్నట్లు పోలీసులకు సమాచారం అందింది. దీంతో మంగళవారం పోలీసులు అక్కడికి చేరుకుని అక్రమ మైనింగ్‌ను అడ్డుకోవడానికి ప్రయత్నించారు. ఈ క్రమంలో దుండగులు డీఎస్పీని ట్రాక్టర్‌తో గుద్ది చంపేశారు. ఈ మేరకు పోలీసులు కేసు నమోదు చేసుకుని విచారణ చేపట్టారు.
పోలీసులు తెలిపిన వివరాల ప్రకారం.. అరావలి కొండల్లో అక్రమ మైనింగ్ జరుగుతున్నట్లు సమాచారం వచ్చిందన్నారు. ఈ మేరకు స్థానిక డీఎస్పీ సురేందర్ సింగ్ మైనింగ్‌ను అడ్డుకునేందుకు బయల్దేరాడు. దీంతో డంపర్ డ్రైవర్ తన వాహనాన్ని డీఎస్పీ దగ్గరికి తీసుకెళ్లాడు. పేపర్లు చెకింగ్ చేయాలని డీఎస్పీ అడ్డుకోవడంతో డ్రైవర్ దురుసుగా ప్రవర్తించి.. వేగంగా వాహనాన్ని నడిపాడు. ఈ క్రమంలో డీఎస్పీకి తీవ్రగాయాలు అయ్యాయి. డీఎస్పీని ఆస్పత్రికి తరలించే క్రమంలో మృతి చెందినట్లు పోలీసులు తెలిపారు. కాగా, నుహ్ జిల్లాలో అక్రమ మైనింగ్ ఎక్కువగా జరుగుతుంది. ప్రతి ఏడాది 50కి పైగా ఫిర్యాదులు వచ్చినా.. పోలీసులు పట్టించుకోరని సమాచారం.
