రాష్ట్రవ్యాప్తంగా సంచలనం రేకెత్తించిన టీఎస్పీఎస్సీ పేపర్ లీకేజీ కేసులో సిట్ దర్యాప్తు ముమ్మరం చేసింది. ఈ కేసుతో సంబంధమున్న వారందరినీ బయటకు లాగి విచారిస్తోంది. ఇప్పటికే ప్రధాన నిందితుల నుంచి కీలక ఆధారాలు సేకరించింది. అయితే ఈ నెలరోజుల పాటు దర్యాప్తు సాగించిన సిట్.. ఆ నివేదికను ఇవాళ హైకోర్టుకు సమర్పించనుంది.
సిట్ నివేదికలో టీఎస్పీఎస్సీ ఛైర్మన్, టీఎస్పీఎస్సీ సెక్రెటరీ, సభ్యుడి వాంగ్మూలాలను అధికారులు పొందుపరిచారు. పేపర్ లీకేజీ కేసులో మొత్తం 17 మందిని సిట్ అరెస్టు చేసింది. కీలక నిందితులైన ప్రవీణ్, రాజశేఖర్ ,డాక్యా నాయక్ను సిట్ విచారించిన విషయం తెలిసిందే. ఈ విచారణలో ఏఈ, గ్రూప్-2 పరీక్షా ప్రశ్నాపత్రాలను ప్రవీణ్, రాజశేఖర్ లీక్ చేసినట్లు తెలిసింది. దర్యాప్తు నివేదికలో నిందితుల పెన్డ్రైవ్, మొబైల్స్లో ప్రశ్నాపత్రాలు ఉన్న గుర్తించిన ఎఫ్ఎస్ఎల్ నివేదికను కూడా సిట్ జతపరిచింది. ఈ కేసులో సిట్ దాదాపు 150 మందిని విచారించింది.
