దేశ వ్యాప్తంగా సంచలనం రేకెత్తించిన దిల్లీ లిక్కర్ స్కామ్ కేసు మరోసారి తెరపైకి వచ్చింది. ఇప్పటికే ఈ కేసులో ప్రముఖులు అరెస్ట్ అయి ఈడీ విచారణను ఎదుర్కొంటున్న విషయం తెలిసిందే. మరి కొందరు ఈడీ నోటీసులతో తరచూ ఈడీ కార్యాలయాలకు పరుగు తీస్తున్నారు. ఈ వ్యవహారంతో నిందితుడిగా ఆరోపణలు ఎదుర్కొంటున్న అభిషేక్ బోయినపల్లి తన అరెస్టు చట్టబద్ధతను సవాల్‌ చేస్తూ సుప్రీం కోర్టులో పిటిషన్ దాఖలు చేశారు. ఈ పిటిషన్లపై ఇవాళ సుప్రీం విచారణ చేపట్టింది.
పిటిషన్‌ను దిల్లీ హైకోర్టు కొట్టివేయడంతో అభిషేక్సు ప్రీంను ఆశ్రయించారు. పీఎంఎల్‌ఏ సెక్షన్ 19 పరిగణనలోకి తీసుకోకుండా అభిషేక్ను అరెస్టు చేశారని ఆయన తరఫు లాయర్లు సుప్రీం కోర్టు దృష్టికి తీసుకువెళ్లారు. సీబీఐ కేసులో బెయిల్ వచ్చాక ఈడీ కేసులో అరెస్టు చేశారని తెలిపారు. మరోవైపు అభిషేక్ బోయినపల్లి బెయిల్ పిటిషన్‌ను వ్యతిరేకిస్తూ ఈడీ అధికారులు సర్వోన్నత న్యాయస్థానంలో అప్లికేషన్ వేశారు. ఈ క్రమంలో అభిషేక్ బోయినపల్లి లేవనెత్తిన అంశాలపై కౌంటర్ దాఖలుకు ఈడీకి సుప్రీం ఆదేశాలు జారీ చేసింది. 5 రోజుల్లో కౌంటర్ దాఖలు చేయాలని పేర్కొంది. ఈడీ కౌంటర్‌కు రిప్లై దాఖలుకు అభిషేక్ న్యాయవాదులను ఆదేశిస్తూ.. విచారణను డిసెంబర్ 4కు వాయిదా వేసింది.
