దేశం మొత్తం అయోధ్య రామ మందిరం ప్రారంభోత్సవం కోసం ఆసక్తిగా ఎదురుచూస్తుంది.. ఇప్పటికే పల్లె నుంచి పట్టణాల వరకూ ప్రతి ఇంటికి ఆ శ్రీ రామచంద్రుని అక్షింతలు చేరాయి. వందల ఏళ్ల నాటి కల జనవరి 22న నెరవేరబోతుంది. ఇదిలా ఉండగా.. అయోధ్యలో రామ మందిర ప్రారంభోత్సవంతో పాటు ఈ నెలలో రూ. 50,000 కోట్ల విలువైన పరిశ్రమ ఏర్పడుతుందని కాన్ఫెడరేషన్ ఆఫ్ ఆల్ ఇండియా ట్రేడర్స్ నివేదిక పేర్కొంది. రామ మందిరాన్ని ఈ నెలలో ప్రారంభించడం వల్ల దేశంలో వ్యాపార వృద్ధికి దోహదపడుతుందని సీఏఐటీ సెక్రటరీ జనరల్ ప్రవీణ్ ఖండేల్వాల్ అన్నారు.
భారతీయ మార్కెట్లలో ప్రత్యేకమైన ఫాబ్రిక్ నెక్లెస్‌లు, లాకెట్లు, కీ చైన్‌లు, రామ మందిరాల నమూనాలు, రామ్ దర్బార్, రామధ్వజ చిత్రాలు మొదలైన వాటికి గణనీయమైన డిమాండ్ ఉంది. అదనపు వాణిజ్యం కోసం డిమాండ్‌ను తీర్చేందుకు అన్ని రాష్ట్రాల వ్యాపారులు విస్తృతంగా సన్నాహాలు చేశారని CAIT సెక్రటరీ జనరల్ చెప్పారు.
వినియోగదారుల డిమాండ్‌కు అనుగుణంగా వ్యాపారులు బ్యాంగిల్స్ మరియు డెకరేటివ్ పెండెంట్‌లు వంటి అనేక రకాల ఉపకరణాలను కూడా మార్కెట్లో అందుబాటులో ఉంచారు. అలాగే కుర్తాలు, టీ-షర్టులు మరియు రామ మందిర చిత్రాలను కలిగి ఉండే ఇతర కస్టమైజ్డ్ వేర్‌లకు మార్కెట్లో గిరాకీ బాగా ఉందని వ్యాపారుల సంఘం పేర్కొంది.
రామ మందిర ప్రారంభోత్సవానికి లక్షలాది మంది భక్తులు, 7,000 మంది ఆహ్వానిత అతిథులు అయోధ్యకు చేరుకుంటారు. ఇప్పటికే విమానయాన సంస్థలు అయోధ్యకు టికెట్ ధరలను పెంచాయి. అంతేకాదు, అయోధ్యలోని హోటళ్లు కూడా గదుల ధరలను ఐదు రెట్లు పెంచాయి. ఈ సందర్భంగా అన్ని రంగాల వ్యాపారులు భారీ లాభాలను ఆర్జించబోతున్నారని సంస్థ అభిప్రాయపడింది. ఈ కాలంలో అయోధ్యలోని రెస్టారెంట్లు శాకాహారాన్ని మాత్రమే అందిస్తాయనే వార్తలు వచ్చాయి. అది జరిగితే, లక్షలాది మంది భక్తులను స్వీకరించడానికి రైతులు మరియు ఇతరులకు భారీ ఆర్డర్లు అందుతాయి.
