ఇటీవల పల్నాడు బస్సు ప్రమాదంలో పలువురు సజీవ దహనమైన ఘటన మరవకముందే మరో ప్రాంతంలో బస్సులో మంటలు చెలరేగాయి. ఈ ఘటనలో ఎనిమిది అక్కడికక్కడే సజీవదహనమయ్యారు. ఈ దారుణ ఘటన హర్యానా రాష్ట్రంలో చోటుచేసుకుంది. స్థానికుల సమాచారంతో ఘటనాస్థలికి చేరుకున్న పోలీసులు, రెస్క్యూ టీమ్ సహాయక చర్యలు చేపట్టాయి.
పోలీసులు తెలిపిన వివరాల ప్రకారం.. శనివారం అర్ధరాత్రి హర్యానాలోని నూహ్ జిల్లాలో ఓ బస్సులో అకస్మాత్తుగా మంటలు చెలరేగాయి. అందులో ఉన్న ప్రయాణికులకు ఏం జరుగుతుందో అర్థమయ్యేలోగా ఎనిమిది మంది సజీవదహనమయ్యారు. మరికొందరు బస్సులో నుంచి దూకి ప్రాణాలు కాపాడుకున్నారు. ఘటనాస్థలికి చేరుకున్న అగ్నిమాపక సిబ్బంది మంటలు ఆర్పి ప్రయాణికులను కాపాడారు. ఈ ఘటనలో ఎనిమిది మృతి చెందగా మరో 24 మంది తీవ్రంగా గాయపడ్డారు. ప్రమాదంపై కేసు నమోదు చేసుకున్న పోలీసులు ఘటనకు గల కారణాలపై ఆరా తీస్తున్నారు. మృతుల వివరాలను కూడా సేకరిస్తున్నారు. బస్సులో ఎంత మంది ప్రయాణిస్తున్నారో తెలియాల్సి ఉంది.
