వనపర్తి జిల్లాలో ఘోర రోడ్డు ప్రమాదం చోటుచేసుకుంది. సాధువులపైకి ఓ డీసీఎం దూసుకెళ్లింది. పెబ్బేరు మండలం రంగాపురం వద్ద జాతీయ రహదారిపై జరిగిన ఈ ఘటనలో ముగ్గురు సాధువులు మృతి చెందారు. ఘటనాస్థలికి చేరుకున్న పోలీసులు కేసు నమోదు చేసుకుని దర్యాప్తు చేస్తున్నారు.
పోలీసులు తెలిపిన వివరాల ప్రకారం.. పెబ్బేరు నుంచి కర్నూలు వైపు గుజరాత్‌కు చెందిన సాధువుల బృందం నడుచుకుంటూ వెళ్తోంది. ఈ క్రమంలో ఇవాళ ఉదయం అటుగా వెళ్తున్న ఓ డీసీఎం వాహనం వారిని కొట్టింది. ఈ ఘటనలో ఇద్దరు అక్కడికక్కడే మృతి చెందారు. స్థానికులు గమనించి 108కు ఫోన్ చేయగా వారిని ఆస్పత్రికి తరలించారు. క్షతగాత్రుడు ఆస్పత్రిలో చికిత్స పొందుతూ మరణించారు. ఘటనకు సంబంధించిన పూర్తి వివరాలు తెలియాల్సి ఉందని పోలీసులు తెలిపారు.
