కరోనా కట్టడిలో భాగంగా విధించిన లాక్ డౌన్ కారణంగా ఇళ్లకే పరిమితమైన సెలబ్రిటీలు తమదైన శైలిలో అభిమానులను అలరిస్తున్నారు. సోషల్ మీడియా వేదికగా కరోనాపై అవగాహన కల్పించడమే కాకుండా.. తమకు సంబంధించిన ఫన్నీ వీడియోలను కూడా పోస్ట్ చేస్తున్నారు. ఇండియాలోనే బెస్ట్ సెలబ్రిటీ కపుల్స్‌లో ఒకటిగా నిలిచే విరాట్ కోహ్లి, అనుష్కలు సోషల్ మీడియాలో యాక్టివ్ గా ఉంటారనే సంగతి తెలిసిందే.
ప్రస్తుతం విరుష్కా జోడి ఇంట్లోనే ఉంటూ లాక్‌డౌన్‌ను ఆస్వాదిస్తున్నారు. అదేవిధంగా సోషల్ మీడియాలో అభిమానులకు వినోదాన్ని పంచుతున్నారు. ఇటీవల కోహ్లికి న్యూ హెయిర్‌ కట్‌ ట్రై చేసిన అనుష్క.. తాజాగా అతడిని ఆట పట్టించే యత్నం చేసింది. తనదైన శైలిలో అల్లరి చేసిన అనుష్క.. విరాట్ బిత్తరపోయేలా చేసింది. ‘ఏయ్‌ కోలి కోలి.. చౌకా మార్ చౌకా క్యా కర్ రహ’ అంటూ సరదాగా కోహ్లిని ఏడిపించే యత్నం చేసింది అనుష్క.
అనుష్క అల్లరి చేస్తున్న సమయంలో కోహ్లి బిత్తరపోయి చూస్తూ మౌనంగా ఉండిపోయాడు. ఇందుకు సంబంధించిన వీడియోను అనుష్క తన ఇన్‌స్టాగ్రామ్‌లో పోస్ట్ చేశారు. “కోహ్లి క్రికెట్ చాలా మిస్సవుతున్నాడని నేను అనుకుంటున్నాను. అలాగే లక్షలాది మంది అభిమానుల నుంచి అతడు పొందే ప్రేమను కూడా. ముఖ్యంగా ఇలాంటి అభిమానిని కూడా. అందుకే నేనే కోహ్లికి ఆ అనుభూతి కలిగించాను” అని అనుష్క పేర్కొన్నారు.
