మొక్కలకు నీరు సమృద్దిగా ఉంటేనే అవి ఏపుగా ఎదుగుతాయి. అప్పుడే మంచి దిగుబడి ఉంటుంది. ముఖ్యంగా కాయగూరలు సాగుచేస్తున్న రైతులు సకాలంలో నీటి తడులు ఇవ్వాల్సి ఉంటుంది. ఈరోజు మనం కూరజాతి పంటలవారీగా నీటి యాజమాన్యం గురించి తెలుసుకుందామా..!
క్యారెట్: నేల స్వభావం, వాతావరణం పరిస్ధితులను బట్టి 7 రోజుల కు ఒకసారి నీరు అందించాలి. దుంప పెరుగుదల దశలో తగినంత తేమ ఉండాలి. తేమ ఎక్కవగా ఉంటే క్యారెట్ నాణ్యతపై ప్రభావం పడుతుంది.
వంగ: ఈ పంటకు నారు నాటే ముందు లేదా నాటిన తరువాత నీటిని ఇవ్వాలి. నేలలో తేమను బట్టి వారానికి ఒక సారి వేసవిలో 4 రోజులకొకసారి తడి ఇవ్వాలి. పూత, కోత దశలో నేలలో తేమ ఉండాలి. లేదంటే పూత రాలిపోతుంది. వేసవిలో అయితే.. కాయ కోతకు ఒక రోజు ముందే నీటి తడి ఇవ్వాలి. లేదంటే కాయలో చేదు శాతం పెరుగుతుంది.
టమోటా; టమోటా సాగు చేసే రైతులు వేసవిలో పంటను కాపాడుకునేందుకు సకాలంలో నీటి తడులు ఇవ్వటం చాలా ముఖ్యం.. వారానికి ఒకసారి నీటి తడులు ఇవ్వటం వల్ల పంటను కాపాడుకోవచ్చు.
క్యాబేజీ, క్యాలీ ఫ్లవర్: ఈ రెండు పంటలకు.. నాటిన వెంటనే నీరు కట్టాలి. నల్లరేగడి నేలల్లో 10 రోజులకు ఒకసారి, తేలిక నేలల్లో 6 రోజులకు ఒకసారి నీరు పెట్టాలి. గడ్డలు కోతకు వచ్చే 5 రోజుల ముందు నీరు పెట్టడం ఆపాలి. నీటిని ఎక్కువ ఇస్తే గడ్డలు పగిలే అవకాశం లేకపోలేదు. ఈ రెండు పంటలకు నీటిని ఎక్కువగా ఇవ్వాల్సి ఉంటుంది.
మిరప: ఈ పంట అధిక తేమను, బెట్టను తట్టుకోలేదు. తేమ పెరిగితే పూత రాలిపోతుంది. తెగుళ్లు ఆశించి దిగుబడులు తగ్గుతాయి. బెట్టకు గురైనప్పుడు పూత రాలడంతోపాటు కొత్త రెమ్మలు కూడా ఏర్పడవు. నల్ల రేగడి నేలల్లో 3వారాలకు ఒకసారి , తేలిక నేలల్లో 15 రోజులకు ఒక సారి , వేసవి
పంటలో 6 రోజులకు ఒకసారి నీరు అందించాల్సి ఉంటుంది.
చిక్కుడు: పందిరి రకాలకు పాదులో మట్టి 3 సెంటీమీటర్ల లోతులో ఎండినప్పుడు నీరు ఇవ్వాల్సి ఉంటుంది.. పాదుల్లో నీరు నిల్వ ఉండకుండా చూడాలి. చిక్కుడు, గోరుచిక్కుడు కొంతవరకు నీటి ఎద్దడిని తట్టుకోగలుగుతాయి. ఫ్రెంచి చిక్కుడు అధిక తేమను, నీటి ఎద్దడిని తట్టుకోలేవు. 7 నుండి 10 రోజుల కొకసారి నేల స్వభావాన్ని బట్టి నీరు అందించాల్సి ఉంటుంది.
ఉల్లి: ఉల్లికి తరుచుగా నీరు అందిస్తుండాలి. నారు దశలో వారం వ్యవధిలో రెండు సార్లు నీరు ఇవ్వాలి. తరువాత 60 రోజుల వరకు 12 రోజులకు ఒకసారి నీరు అందించాల్సి ఉంటుంది. గడ్డ ఊరే సమయంలో 7 రోజుల వ్యవధిలో 7 తడులు ఇవ్వాలి. కోతకు 15 రోజుల ముందు నీరు ఇవ్వటం ఆపాలి. ఖరీఫ్‌లో 8, రబీలో 12, వేసవిలో 15 సార్లు నీటి తడి ఇవ్వాలి. గడ్డ పెరిగే దశలో నీటి ఎద్దడి లేకుండా చూసుకోవడం ముఖ్యం.
