పాన్ ఇండియా స్టార్ ప్రభాస్ కథానాయకుడిగా బీ టౌన్ డైరెక్టర్ ఓం రౌత్‌ దర్శకత్వంలో తెరకెక్కిన మైథలాజికల్‌ డ్రామా ఆదిపురుష్. రామాయణానికి ఆధునిక హంగులు జోడించి తీర్చిదిద్దిన ఈ మూవీ జూన్‌ 16న ప్రేక్షకుల ముందుకు రానుంది. ఈ నేపథ్యంలో చిత్రబృందం ప్రమోషన్స్ షురూ చేసింది. ఇందులో భాగంగా ఇవాళ తిరుపతిలో ప్రీ రిలీజ్ ఈవెంట్ నిర్వహిస్తున్నారు. భారీ హంగులతో ఈ వేడుక జరగనుంది. దీనికి సంబంధించి అంగరంగ వైభవంగా ఏర్పాట్లు చేశారు.
ఈ ఈవెంట్లో సినీ చరిత్రలోనే తొలిసారి 50 అడుగుల ప్రభాస్ హాలోగ్రామ్‌ ప్రదర్శించనున్నారు. అయోధ్యను తలపించేలా తిరుపతిలో భారీ సెట్‌ వేశారు. శ్రీరాముడు, వేంకటేశ్వరస్వామి రెండూ శ్రీమహావిష్ణువు అవతారాలే. దాన్ని దృష్టిలో ఉంచుకునే అటు అయోధ్య, ఇటు తిరుపతిల మధ్య ఆధ్యాత్మిక బంధాన్ని తలపించేలా ఈ సెట్‌ను తీర్చిదిద్దారు. 100 డ్యాన్సర్లు, 100మంది గాయనీ గాయకులు ఆదిపురుష్‌తో పాటు, రామాయణానికి సంబంధించిన గీతాలను ఆలపించనున్నారు. డైరెక్టర్ ప్రశాంతవర్మ పర్యవేక్షణలో ఈ కార్యక్రమాన్ని నిర్వహిస్తుండటం గమనార్హం.
