భారతీయ చలనచిత్ర రంగంలో ప్రతిష్ఠాత్మకంగా భావించే జాతీయ చలనచిత్ర అవార్డులను కేంద్ర ప్రభుత్వం తాజాగా ప్రకటించింది. ఇందులో ఉత్తమ నటుడిగా కాంతార ఫేం రిషబ్ శెట్టి అవార్డు పొందారు. ఈ నేపథ్యంలో పలువురు ప్రముఖులు ఆయణ్ను అభినందిస్తున్నారు. ఇందులో భాగంగానే ఉత్తమ నటుడిగా అవార్డును సొంతం చేసుకున్న రిషబ్ శెట్టి, బెస్ట్ నటిగా పురస్కారం అందుకున్న నిత్యా మేనన్‌లకు ఐకాన్ స్టార్ అల్లు అర్జున్ శుభాకాంక్షలు తెలిపారు.
‘జాతీయ అవార్డు విన్నర్స్ కు నా హృదయ పూర్వక అభినందనలు. ఉత్తమ నటుడు అవార్డుకు రిషబ్ శెట్టి అర్హుడు. నా ఫ్రెండ్ నిత్యా మేనన్‌ ఉత్తమ నటిగా అవార్డును సొంతం చేసుకోవడం చాలా సంతోషంగా అనిపిస్తోంది. వీరితో పాటు జాతీయ అవార్డులు గెలుపొందిన అందరికీ నా శుభాకాంక్షలు. నిఖిల్‌, చందు మొండేటిలకు స్పెషల్ కంగ్రాట్స్.’ అని అల్లు అర్జున్ తన పోస్టులో రాసుకొచ్చారు. అల్లు అర్జున్ పోస్టుకు రిషన్ శెట్టి రిప్లై ఇచ్చాడు. ‘థాంక్యూ బ్రదర్‌’ అని కామెంట్ చేశారు. 2021కు గాను అల్లు అర్జున్ ఉత్తమ జాతీయ నటుడిగా అవార్డు గెలుచుకొని చరిత్ర సృష్టించిన సంగతి తెలిసిందే.
