Most Eligible Bachelor: కింగ్ నాగ్ న‌టవార‌సుడు అఖిల్ అక్కినేని.. టాలీవుడ్ బుట్ట‌బొమ్మ పూజ హెగ్డే జంట‌గా తెర‌కెక్కుతున్న చిత్రం మోస్ట్ ఎలిజిబుల్ బ్యాచిలర్. రొమాంటిక్ ఫ్యామిలీ ఎంటర్‌టైనర్ గా తెర‌కెక్కుతున్న ఈ చిత్రానికి బొమ్మరిల్లు భాస్కర్ దర్శకత్వం వ‌హిస్తున్నాడు. ఈ చిత్రాన్ని మెగా నిర్మాత అల్లు అరవింద్ సమర్పణలో జీఏ2 పిక్చ‌ర్స్ బ్యాన‌ర్‌పై బన్నీ వాసు, మరో నిర్మాత ప్ర‌ముఖ ద‌ర్శ‌కుడు వాసు వర్మతో కలిసి సంయుక్తంగా నిర్మిస్తున్నారు.
ఇప్పటివరకు అఖిల్ కెరీర్లో సరైన హిట్ పడలేదు. ఎలాగైనా హిట్ కొట్టేందుకు ప్రయత్నిస్తున్నాడు. దీంతో అఖిల్ మోస్ట్ ఎలిజిబుల్ బ్యాచిలర్ సినిమా పైనే ఆశలన్ని పెట్టుకున్నాడు. కాగా.. ఇటీవల ఈ చిత్రం నుంచి విడుద‌లైన లెహరాయి లిరికల్ పాటకి మంచి ఆదరణ లభిస్తుంది. ప్రేక్షకులను విశేషంగా ఆకట్టుకుంటుంది. ఇప్పటి వరకు 6 మిలియన్ కి పైగా వ్యూస్ ను సొంతం చేసుకొని యూట్యూబ్ మ్యూజిక్ చార్ట్స్‌లో టాప్ 4లో ట్రెండ్ అవుతోంది.
ఈ చిత్రం ట్రైలర్ కూడా యూట్యూబ్ లో దూసుకెళ్తుంది. మొత్తం 5 మిలియన్ల వ్యూస్ ను సొంతం చేసుకుని.. ఇది ట్రైలర్ కూడా ట్రెండింగ్ లో ఉంది. గోపిసుందర్‌ సంగీతం చాలా గొప్పగా ఉంటుంది. ఆయన బాణీలకు త‌గ్గ‌ట్టుగా రచయిత శ్రీమణి ఏ లేలేలే.. లేలేలేలే.. లెహరాయీ లెహరాయీ.. గుండె వెచ్చనయ్యే ఊహలెగిరాయి.. అనే పాట ర‌చ‌న చాలా బాగుంది. ఈ పాట‌కు సిద్‌ గాత్రం అందించడం వల్ల ఎంతో మంది హృదయాలకు ఈ పాట చేరువైంది. ఇక సినిమా దసరా కానుకగా అక్టోబర్ 15న రిలీజ్ కాబోతుంది.
