రెబెల్ స్టార్ ప్రభాస్ ప్రస్తుతం తన 20వ సినిమా షూటింగ్ లో బిజీగా ఉన్నాడు. జిల్ ఫేమ్ రాధా కృష్ణ కుమార్ ఈ చిత్రానికి దర్శ‌క‌త్వం వ‌హించ‌గా.. యూవీ క్రియేషన్స్, గోపీకృష్ణ మూవీస్ బ్యానర్ పై నిర్మితమవుతోంది. పునర్జన్మల నేపథ్యంలో సాగే ఈ రొమాంటిక్ ఎంటర్టైనర్ కి ‘రాధే శ్యామ్’ అనే పేరును పరిశీలిస్తున్నారు. ఈ సినిమాలో ప్రభాస్ జోడీగా పూజా హెగ్డే అలరించనుంది. ఈ చిత్రం వచ్చే యేడాది సమ్మర్‌లో విడుదల కానుంది. ఈ సినిమా తరువాత ప్రభాస్ ఏ దర్శకుడితో కలిసి సెట్స్ పైకి వెళ్లనున్నాడనేది ఆసక్తికరంగా మారింది. ఈ నేపథ్యంలో ఇద్దరు .. ముగ్గురు దర్శకుల పేర్లు వినిపించాయి. ఆ పేర్ల సంగతి అటుంచితే, తాజాగా నాగ్ అశ్విన్ పేరు తెరపైకి వచ్చింది.
‘మహానటి’ సినిమాతో దర్శకుడిగా మంచి మార్కులు కొట్టేసిన నాగ్ అశ్విన్, అప్పటి నుంచి ఒక కథపై కసరత్తు చేస్తూ వస్తున్నాడు. ఇటీవల ఆయన ఆ కథను ప్రభాస్ కి వినిపించడం .. ఆయన గ్రీన్ సిగ్నల్ ఇవ్వడం జరిగిపోయాయట. ప్ర‌ముఖ నిర్మాణ సంస్థ వైజ‌యంతీ మూవీస్ బ్యాన‌ర్‌లో ఈ సినిమా రూపొంద‌నుంది. బుధ‌వారం సినిమాను అధికారికంగా ప్ర‌క‌టించారు. సైన్స్ ఫిక్ష‌న్ బ్యాక్‌డ్రాప్‌లో సినిమా ప్రారంభం కానుంది. త్వరలోనే మిగ‌తా వివ‌రాల‌ను ప్ర‌క‌టించేలా ఉన్నారు. ఇక ప్రభాస్‌తో కలిసి నాగ్ అశ్విన్ ఎలాంటి మ్యాజిక్ క్రియేట్ చేస్తాడో వేచి చూడాలి.
