వివాద‌స్పద చిత్రాల‌కు కేరాఫ్ అడ్ర‌స్‌గా నిలిచిన ద‌ర్శ‌కుడు రామ్ గోపాల్ వర్మ ప్ర‌స్తుతం `క‌మ్మ‌రాజ్యంలో క‌డ‌ప‌రెడ్లు` సినిమాను ప్రేక్ష‌కుల ముందుకు తీసుకు రావ‌డానికి సిద్ధ‌మ‌య్యారు. ఈ క్ర‌మంలోనే దీపావ‌ళి కానుక‌గా ఈ చిత్రం ట్రైల‌ర్‌ను విడుదల చేశారు. ఇక ఈ ట్రైలర్ వేడి చల్లారకముందే నా తర్వాతి సినిమా టైటిల్ ‘మెగా ఫ్యామిలీ’.. అక్టోబర్ 29 ఉదయం 9:36 నిమిషాలకు వివరాలు వెల్లడిస్తానని ఊదరగొట్టాడు. మెగా ఫ్యామిలీపై సినిమా అంటే ఇంకేం కాంట్రవర్సీకి తెరలేపుతాడోనని.. యాంటీ ఫ్యాన్స్, సోషల్ మీడియాలో యాక్టివ్‌గా ఉండే బ్యాచ్, వర్మ ఫ్యాన్స్ అందరూ అప్‌డేట్ కోసం ఆసక్తిగా ఎదురు చూశారు.
క‌ట్ చేస్తే.. ఆ ప్రాజెక్ట్‌ను తాను చేయాల‌నుకోవ‌డం లేద‌ని తాజాగా ట్వీట్ చేశాడు. అందుకు కార‌ణంగా మెగాఫ్యామిలీ సినిమాలో ప్ర‌ధాన పాత్ర‌ధారికి 39 మంది పిల్ల‌లుంటార‌ట. చాలా ఎక్కువ మంది పిల్లలు ఉండ‌టం, పిల్లలు సినిమాలు తీయ‌డంలో తన‌కు అనుభవం లేక‌పోవ‌డంతో `మెగాఫ్యామిలీ` సినిమాను తెర‌కెక్కించాల‌నుకోవ‌డం లేదన్నాడు రామ్‌గోపాల్ వర్మ. దీంతో నెటిజ‌న్లు.. ఇదంతా వర్మ మార్క్ పబ్లిసిటీ స్టంట్ అని, వర్మని నమ్మడం అంత బుద్ధితక్కువ పని మరోటి ఉండదు అంటూ.. రకరకాలుగా కామెంట్స్ పెడుతున్నారు.
