నల్గొండ జిల్లా మిర్యాలగూడలో శుక్రవారం మిట్టమధ్యాహ్నం దారుణం చోటుచేసుకుంది. ప్రణయ్ కుమార్ అనే వ్యక్తిని ఓ ఆసుపత్రి ఎదుట దుండగుడు కత్తితో నరికి చంపాడు. ప్రణయ్ కుమార్, అమృత వ‌ర్షిణి ప్రేమించుకుని ఆరు నెలల క్రితం పెళ్లి చేసుకున్నారు. వైవాహిక జీవితాన్ని సంతోషంగా సాగిస్తున్నారు. భార్యను ఆసుపత్రికి తీసుకెళ్లి తిరిగి వస్తుండగా ఊహించని రీతిలో ఓ దుండగుడు కత్తితో అత్యంత దారుణంగా ప్రణయ్ మెడపై విచక్షణ రహితంగా పొడిచాడు. దీంతో అక్కడిక్కడే బాధితుడు ప్రాణాలు కొల్పోయాడు. భార్య దారుణాన్ని చూసి తట్టుకోలేక భయంతో పరుగులు పట్టింది. మిట్ట మధ్యాహ్నం జరిగిన ఈ హత్య మిర్యాలగూడెంలో కలకలం రేపింది. ప్రేమ వివాహాన్ని నచ్చని అమ్మాయి తరుఫున బంధువులే అతని పై దాడి చేసినట్లు పోలీసులు అనుమానిస్తున్నారు. కేసు నమోదు చేసుకుని అన్ని కోణాల్లో విచారణ చేపట్టనున్నట్లు పోలీసులు తెలిపారు.
