పాన్ ఇండియా స్టార్ ప్రభాస్ రాఘవరాముడిగా. బాలీవుడ్ బ్యూటీ కృతి సనన్ సీతగా నటించిన సినిమా ఆదిపురుష్. ఓం రౌత్ డైరెక్షన్లో తెరకెక్కిన ఈ చిత్రం జూన్ 16వ తేదీన థియేటర్లో విడుదలైంది. తాజాగా ఈ సినిమాకు వ్యతిరేకంగా కోర్టులో ఓ పిటిషన్‌ దాఖలైంది. హిందువుల విశ్వాసాలు, మనోభావాలను దెబ్బతీసేలా సినిమాను తీశారంటూ హిందూసేన జాతీయ అధ్యక్షుడు విష్ణు గుప్త దిల్లీ హైకోర్టు లో ప్రజా ప్రయోజన వ్యాజ్యం దాఖలు చేశారు.
‘‘వాల్మీకి, తులసీదాస్‌ వంటి వారు రచించిన రామాయణంలోని పాత్రలకు విరుద్ధంగా ఈ చిత్రంలోని ప్రధాన పాత్రలను అనుచిత రీతిలో తెరకెక్కించారు. హిందువుల మనోభావాలను దెబ్బతీసే విధంగా ఇందులో పాత్రలు ఉన్నాయి. ఈ చిత్రంలో దేవతామూర్తుల వర్ణన సరైన రీతిలో లేదు. హిందూ బ్రాహ్మణుడైన రావణ పాత్రధారి గడ్డంతో కన్పించడం అభ్యంతరకరంగా ఉంది. ఇది హిందూ నాగరికతను అవమానించడమే. ఈ సన్నివేశాలను సరిదిద్దడం లేదా తొలగించడం చేయాలి. లేదంటే సినిమా ప్రదర్శనను నిలిపివేయాలి’’ అని విష్ణు గుప్త తన పిటిషన్‌లో పేర్కొన్నారు. ఈ పిటిషన్‌పై న్యాయస్థానం ఇంకా ఎలాంటి నిర్ణయం తీసుకోలేదు.
