కాంగ్రెస్ పార్టీ అధ్యక్ష ఎన్నికల పోలింగ్ ప్రశాంతంగా ముగిసింది. ఉదయం 10 గంటలకు ప్రారంభమైన ఓటింగ్ సాయంత్రం 4 గంటల వరకు కొనసాగింది. దేశవ్యాప్తంగా 65 పోలింగ్ కేంద్రాల్లో కాంగ్రెస్ ప్రతినిధులు ఓటు హక్కు వినియోగించుకున్నారు. ఏఐసీసీ కేంద్ర కార్యాలయంలో సోనియా గాంధీ, ప్రియాంక గాంధీ వాద్రా, మాజీ ప్రధాని మన్మోహన్ సింగ్ సహా పలువురు ప్రముఖులు ఓటేశారు.
137 ఏళ్ల సుదీర్ఘ చరిత్ర కలిగిన కాంగ్రెస్ పార్టీ అధ్యక్ష ఎన్నికల పోలింగ్ ఇవాళ విజయవంతంగా జరిగింది. కాంగ్రెస్ పార్టీ సీనియర్‌ నేతలు మల్లిఖార్జున ఖర్గే, శశిథరూర్‌ అధ్యక్ష ఎన్నికల బరిలో నిలిచారు. 24 ఏళ్ల సుదీర్ఘ విరామం తర్వాత గాంధీ కుటుంబం కాకుండా ఇతర వ్యక్తి ఏఐసీసీ పగ్గాలు చేపట్టనున్నారు. సాయంత్రం 4 గంటల సమయానికి 96 శాతం పోలింగ్ నమోదైందని పార్టీ వర్గాలు తెలిపాయి.
