టాలీవుడ్‌లో మాస్‌, క్లాస్ హీరోగా పేరు తెచ్చుకున్నారు అక్కినేని నాగార్జున. గత మూడు దశాబ్దాలకు పైగా సినిమాల్లో నటిస్తూ ప్రేక్షకులను అలరిస్తున్నారు. ఇటీవల రణబీర్‌ కపూర్‌, అలియాభట్‌ నటించిన బ్రహ్మాస్త్రలో కీలక పాత్ర పోషించారు. తాజాగా ఓ ఇంటర్వ్యూలో మాట్లాడుతూ.. తన 100వ సినిమా గురించి ఆసక్తికర వ్యాఖ్యలు చేశారు. ఆ సినిమా కోసం గ్రాండ్‌గా ప్లాన్‌ చేస్తున్నట్లు చెప్పారు. ఈ ప్రాజెక్టు కోసం తను నలుగురు దర్శకులతో చర్చలు కూడా జరిపినట్లు తెలిపారు.
”నా 100వ సినిమా ఒక విజువల్ వండర్‌లా ఉండాలి. మరో ‘బ్రహ్మాస్త్ర’లా ఉండాల్సిన అవసరం లేదు. కానీ అది ప్రేక్షకులను థియేటర్లకు వచ్చేలా చేయాలి. అలా అని ఎక్కువ గ్రాఫిక్స్‌ ఉండాలన్న నిబంధన లేదు. ప్రజలను సినిమా హాలుకు రప్పించడం అన్నింటికంటే గొప్ప విషయం. తాజాగా విడుదలైన ‘సీతారామం’ ఎంతో బాగుంది. అలాగే అమల నటించిన శర్వానంద్‌ సినిమా ‘ఒకే ఒక జీవితం’ కూడా మంచి విజయం సాధించింది” అన్నారు.
ఇటీవల కాలంలో నాగ్ సీనియ‌ర్ దర్శకులతో కాకుండా రాహుల్ ర‌వీంద్ర‌న్‌, శ్రీరామ్ ఆదిత్య, క‌ల్యాణ్ కృష్ణ కుర‌సాల, ప్ర‌వీణ్ స‌త్తారు లాంటి యువ దర్శకులతో సినిమాలు చేస్తున్న సంగ‌తి తెలిసిందే. ప్రస్తుతం నాగార్జున ప్రవీణ్‌సత్తార్‌ దర్శకత్వంలో ‘ది ఘోస్ట్‌’లో నటిస్తున్నారు. ఈ సినిమాలో నాగార్జున సరసన సోనాల్‌ చౌహాన్‌ నటిస్తోంది. ఇప్పటికే విడుదల అయిన పోస్టర్స్, టీజర్స్, సాంగ్స్ ప్రేక్షకులను అలరిస్తున్నాయి. చిత్రీకరణ పూర్తిచేసుకున్న ఈ చిత్రం అక్టోబర్‌ 5న ప్రేక్షకుల ముందుకు రానుంది. అదే రోజున మెగాస్టార్ నటించిన గాడ్ ఫాదర్ కూడా రిలీజ్ కానుంది.
