బదిలీలను నిరసిస్తూ విధులు బహిష్కరించిన న్యాయవాదులు

ఏపీ హైకోర్టుకు చెందిన న్యాయమూర్తుల బదిలీలను నిరసిస్తూ న్యాయవాదులు హైకోర్టులో విధులు బహిష్కరించారు. వివిధ హైకోర్టుల నుంచి ఏడుగురు న్యాయమూర్తులను ఇతర హైకోర్టులకు బదిలీ చేస్తూ సుప్రీంకోర్టు కొలీజియం గురువారం సిఫార్సు చేసిన విషయం తెలిసిందే. ఇందులో తెలంగాణ హైకోర్టు నుంచి ముగ్గురు, ఆంధ్రప్రదేశ్, మద్రాస్ హైకోర్టుల నుంచి ఇద్దరి చొప్పున న్యాయమూర్తులు ఉన్నారు.

వీటిలో ఆంధ్రప్రదేశ్ నుంచి జస్టిస్ బట్టు దేవానంద్ మద్రాస్ హైకోర్టుకు, జస్టిస్ డి రమేష్ ను అలహాబాద్ హైకోర్టుకు బదిలీ చేశారు. ఈ బదిలీలను నిరసిస్తూ న్యాయవాదులు ఆందోళన చేపట్టారు. న్యాయమూర్తుల బదిలీ సరికాదన్నారు. గుజరాత్ హైకోర్టు జడ్జి బదిలీ నిర్ణయాన్ని వెనక్కి తీసుకున్నారని.. ఏపీ జడ్జిల బదిలీ ప్రతిపాదన వివక్షతకు సంకేతం అని న్యాయవాదులు ఆరోపిస్తున్నారు. జడ్జిల బదిలీలో వివక్ష చూపుతున్నారని నిరసిస్తూ హైకోర్టులో న్యాయవాదులు విధులు బహిష్కరించారు.