తీర్థయాత్రలకు వెళ్లే భక్తులకు దక్షిణ మధ్య రైల్వే శుభవార్త చెప్పింది. దక్షిణ మధ్య రైల్వే నుంచి తొలి భారత్ గౌరవ్ పర్యాటక రైలు ఈనెల 18న సికింద్రాబాద్ రైల్వే స్టేషన్ నుంచి పట్టాలు ఎక్కనుంది. ‘పుణ్యక్షేత్ర యాత్ర’ పేరుతో పూరీ, కాశీ, అయోధ్య క్షేత్రాల్ని సందర్శించుకునేలా యాత్ర ప్రణాళిక రూపొందించినట్లు ద.మ.రైల్వే జీఎం అరుణ్ కుమార్ జైన్ తెలిపారు. రెండో ట్రిప్‌ ఏప్రిల్‌ 18న మొదలవుతుందని, ప్రతి నెలా ఈ ప్యాకేజీ అందుబాటులో ఉంటుందని ఆయన వెల్లడించారు.
8 రాత్రులు, 9 రోజులపాటు ఈ యాత్ర సాగుతుంది. సికింద్రాబాద్ స్టేషన్‌లో 18న ప్రారంభమయ్యే భారత్ గౌరవ్ రైలు..పూరీ, కోణార్క్‌, గయ, వారణాసి, అయోధ్య, ప్రయాగ్‌రాజ్‌ చేరుకుంటుంది. అక్కడి నుంచి తిరుగు ప్రయాణమై 26 ఉదయం 6 గంటలకు సికింద్రాబాద్‌కు చేరుకోవడంతో యాత్ర ముగుస్తుంది. తెలుగు రాష్ట్రాల్లో ఈ రైలు సికింద్రాబాద్, కాజీపేట, ఖమ్మం, విజయవాడ, ఏలూరు, రాజమండ్రి, సామర్లకోట, విశాఖపట్నం, విజయనగరం స్టేషన్లలో ఆగుతుంది.
ప్యాకేజీలో ప్రయాణ ఛార్జీలు, స్థానిక రవాణా, భోజనం, వసతి ఖర్చులు కలిపి ఉంటాయని ద.మ.రైల్వే తెలిపింది. స్లీపర్‌లో: సింగిల్‌ షేరింగ్‌ రూ.15,300, గదిని ఇద్దరు, ముగ్గురు షేర్‌ చేసుకుంటే రూ.13,955 ; 5-11 ఏళ్ల పిల్లలకు రూ.13,060.
థర్డ్‌ ఏసీలో: సింగిల్‌ షేరింగ్‌ రూ.24,085, గదిని ఇద్దరు లేదా ముగ్గురు షేర్‌ చేసుకుంటే రూ.22,510; 5-11 ఏళ్ల పిల్లలకు రూ.21,460.
సెకండ్‌ ఏసీలో: సింగిల్‌ షేరింగ్‌ రూ.31,510, గదిని ఇద్దరు లేదా ముగ్గురు షేర్‌ చేసుకుంటే రూ.29,615; 5-11 ఏళ్ల పిల్లలకు రూ.28,360.
