పాన్ ఇండియా స్టార్ ప్రభాస్ కథానాయకుడిగా ఓం రౌత్ దర్శకత్వంలో రూపొందుతున్న ఇతిహాసగాథ ‘ఆదిపురుష్’. రామాయణం ఆధారంగా తీస్తున్న ఈ చిత్రంలో ప్రభాస్ రాముడిగా నటిస్తున్నారు. కృతిసనన్ సీతగా, సన్నీ సింగ్ లక్ష్మణుడిగా కనిపించనున్నారు. సైఫ్ అలీఖాన్ రావణాసురుడిగా నటించారు. ప్రముఖ బాలీవుడ్ నటి హేమ మాలిని కూడా ఓ ప్రధాన పాత్ర పోషిస్తున్నారు.
ఈ సినిమాకు సంబంధించి టీజర్ ను అయోధ్యలో విడుదల చేసింది చిత్రబృందం. అయితే ఈ టీజర్ పై ఇప్పటికే మీమ్స్, ట్రోల్స్ తెగ వైరల్ అవుతున్నాయి. మరోవైపు ఆదిపురుష్ టీమ్ పై బీజేపీ ఫైర్ అవుతోంది. చరిత్రను, పురాణాలను ఇష్టమొచ్చిన రీతిలో చూపిస్తారా అంటూ బీజేపీ నాయకులు మండిపడుతున్నారు.
‘బహుశా డైరెక్టర్ ఓం రౌత్.. వాల్మీకి రామాయణం, తులసీదాసు రామాయణంలో రావణుడి పాత్ర ఎలా ఉంటుందో అధ్యయనం చేయలేదనుకుంటాను. కనీసం తెలుగు, తమిళంలో ఇదివరకు తెరకెక్కిన పౌరాణిక సినిమాల్లో రావణుడి పాత్ర ఎలా ఉందో పరిశీలించాల్సింది. టీజర్లో రావణుడు నీలి కళ్లతో లెదర్ జాకెట్ వేసికున్నట్లు చూపించారు. స్వేచ్ఛా ముసుగులో చరిత్రను వక్రీకరించకూడదు. రామాయణం మన దేశ ప్రజల నాగరికతను కాపాడుతుంది. అలాంటి రామాయణాన్ని ఆధారంగా తీసుకుని తెరకెక్కిస్తున్న సినిమాలో రావణుడి పాత్రను వక్రీకరించినందుకు చాలా బాధగా ఉంది. ”
– మాళవిక అవినాశ్, బీజేపీ అధికార ప్రతినిధి
