దేశంలో కరోనా వైరస్ విజృంభణ కొనసాగుతూనే ఉంది. ఈ మహమ్మారికి ఇంకా వ్యాక్సిన్ అందుబాటులోకి రాలేదు. ఇక సామాన్య ప్రజల నుండి సెలెబ్రెటీల వరకు ఎవరిని వదలడం లేదు ఈ వైరస్. ఈ మహమ్మారి కారణంగా చాల సెలబ్రెటీలు చనిపోయారు. మరికొంత మంది ఆసుపత్రిలో చికిత్స పొందుతున్నారు. తాజాగా మరో హీరోయిన్ కృతిసనన్ కి కరోనా వైరస్ సోకింది.
సూపర్ స్టార్ మహేశ్‌బాబు ‘వన్ నేనొక్కడినే’ సినిమాలో హీరోయిన్‌గా నటించిన కృతిసనన్ అందరికి గుర్తుండే ఉంటుంది. ఆ తర్వాత ఒకటి, రెండు తెలుగు సినిమాల్లో నటించినా అంతగా గుర్తింపు రాకపోవడంతో బాలీవుడ్‌కి మకాం మార్చింది ఈ అమ్మడు. వన్ సినిమాలో తన అందచందాలతో కుర్రకారును హుషారెత్తించిన ఈ భామ ప్రస్తుతం కరోనా వైరస్ సోకింది. ఈ విషయాన్ని తనే స్వయంగా వెల్లడించింది.
ప్రస్తుతం కృతిసనన్ ప్రస్తుతం లుక్కా చుప్పి సినిమాలో నటిస్తున్నారు. ఈ సినిమా షూటింగ్ చండీగఢ్‌ లో కొనసాగుతుండగా వారం రోజుల క్రితం షూటింగ్ ముగించుకొని ఇంటికి వచ్చేశారు. అయితే ఆరోగ్యం నలతగా ఉండటం గమనించిన కృతి అనుమానం వచ్చి కరోనా నిర్ధారణ పరీక్షలు చేయించుకుంది. దీంతో కరోనా పాజిటివ్‌గా తేలింది. ఇక ఈ విషయాన్ని తనే ప్రముఖ సోషల్‌మీడియా ప్లాట్‌ఫాం ఇన్‌స్టాగ్రామ్‌ ద్వారా వెల్లడించింది.
ఇక ప్రస్తుతం ఆమె ముంబైలోని తన నివాసంలో హోమ్ క్వారంటైన్‌లో ఉంటున్నారు. అయితే ఈ మధ్య తనను కలిసిన వాళ్లు, బంధువులు, స్నేహితులు అందరూ కరోనా నిర్ధారణ పరీక్షలు చేయించుకోవాలని సూచించింది. ఇదిలా ఉంటే ప్రభాస్ హీరోగా పాన్‌ ఇండియా చిత్రం ‘ఆదిపురుష్‌’ లో కృతిసనన్ నటిస్తున్న సంగతి తెలిసిందే. ఇందులో ఆమె సీత పాత్రలో నటించనున్నారు. ఈ సినిమా షూటింగ్ జనవరిలో ప్రారంభమవుతుందని చిత్ర యూనిట్ ఇటీవల ప్రకటించింది.
