మహారాష్ట్రలోని పూణెలో విషాదం చోటు చేసుకుంది. వాఘోలిలోని సొలాసియా సొసైటీకి చెందిన సెప్టిక్ ట్యాంక్ను క్లీన్ చేస్తుండగా ముగ్గురు కార్మికులు దుర్మరణం చెందారు. ఊపిరి ఆడనందుకే వారు మరణించి ఉండొచ్చని పోలీసులు అనుమానిస్తున్నారు.
ఇవాళ ఉదయం 7 గంటల సమయంలో 18 అడుగుల లోతు గల సెప్టిక్ ట్యాంక్లో ముగ్గురు కార్మికులు ఇరుక్కుపోయారు. సమాచారం అందుకున్న ఫైర్ సిబ్బంది హుటాహుటిన అక్కడికి చేరుకున్నారు. వెంటనే సహాయక చర్యలు ప్రారంభించారు. అప్పటికే ఇద్దరు కార్మికులు మృతి చెందారు. వారి మృత దేహాలను ఫైర్ సిబ్బంది వెలికితీశారు. ఆ తర్వాత మరొకరి కోసం గాలింపు చర్యలు చేపట్టారు. మూడో వ్యక్తి మృతదేహాన్ని కూడా బయటకు తీశారు. మృతి చెందిన వ్యక్తులను నితిన్ ప్రభాకర్ గోడ్, గణేశ్ భలేరోతో పాటు సతీశ్ కుమార్ చౌదరీగా పోలీసులు గుర్తించారు.
కార్మికులు దుర్మరణం వార్త తెలుసుకున్న వారి కుటుంబాలు విషాదంలో మునిగిపోయాయి. ఇంటికి ఉన్న ఒక్క ఆసరా కూడా పోయి దిక్కులేని వారమయ్యామని కన్నీరుమున్నీరుగా విలపించారు.
