మనందరి జీవితాలలో సుఖసంతోషాలు, అదృష్టం నిండాలని కోరుకుంటాం కదూ! మరి మనకు తెలియకుండానే చుట్టుముట్టిన దోషాలు తొలగి, శుభాలు కలగాలంటే ఏం చేయాలి? దానికి సమాధానమే, మన ఆచారాల్లో ఎంతో విశిష్టత కలిగిన నాగుల చవితి పండుగ. కార్తీక మాసం లో నాల్గవ రోజు వచ్చే పండుగ నాగుల చవితి. ఈ ఈరోజు పూజకు శుభ సమయం ఎప్పుడు? ఈ పవిత్రమైన రోజున భక్తిశ్రద్ధలతో పూజ ఎలా చేసుకోవాలి? ఈ పండుగ విశిష్టత, పుట్టలో పాలు పోయటం ఎంత శుభమో తెలుసుకుందాం..
పుట్ట పూజతో దోషాలు దూరం: నాగుల చవితి రోజున నాగదేవతను పూజించడం వెనుక ఎంతో లోతైన ఆధ్యాత్మిక అర్థం, గొప్ప నమ్మకాలు ఉన్నాయి. ముఖ్యంగా, కుజ దోషం, కాలసర్ప దోషం, రాహు-కేతు దోషాలు వంటివి ఉన్నవారు ఈ రోజున నాగదేవతను ఆరాధిస్తే, ఆ దోషాలు తొలగిపోయి, జీవితంలో ఎదురయ్యే ఆటంకాలు దూరమవుతాయని పండితులు చెబుతున్నారు. ఈ పవిత్రమైన రోజున ఉదయాన్నే తలంటు స్నానం చేసి, ఉపవాసం ఉండి, దగ్గరలోని నాగ ప్రతిమలకు లేదా పుట్టకు పూజ చేయాలి.
పూజ విధానం: ఈరోజు (అక్టోబర్ 25)ఉదయం 8:30 నుండి 10:30 మధ్యలో పుట్టలో పాలు పోయటం కు శుభ సమయం అని పండితులు తెలుపుతున్నారు.వీలు కుదరని వారు మధ్యాహ్నం లోగ ఎప్పుడైనా పాలు పోయవచ్చు అని తెలుపుతున్నారు. పుట్ట దగ్గర పసుపు, కుంకుమ, పూలతో అలంకరించి, దీపారాధన చేయాలి. చలిమిడి చిమ్మిలి (నువ్వులు, బెల్లంతో చేసినది), అరటిపండ్లు, పాలు, గుడ్లు వంటి వాటిని నైవేద్యంగా సమర్పించడం శుభప్రదం. ఈ నైవేద్యాలు నాగదేవతకు ప్రీతికరమైనవిగా భావిస్తారు. ఆవు పాలను పుట్టలో పోసి, నాగదేవతను ప్రార్థిస్తే సకల పాపాలు తొలగిపోతాయని, ఆరోగ్యం, సౌభాగ్యం లభిస్తాయని భక్తుల విశ్వాసం. ‘ఓం నాగేంద్రస్వామినే నమః’ అనే మంత్రాన్ని 108 సార్లు జపించడం వల్ల కూడా గొప్ప ఫలితాలు కలుగుతాయి. సంతానం లేని దంపతులు ఈ వ్రతాన్ని ఆచరిస్తే సంతాన ప్రాప్తి కలుగుతుందని నమ్మకం..
గమనిక: నాగదేవతకు పూజ చేసే సమయంలో పాలు, నైవేద్యాలు (చలిమిడి, చిమ్మిలి వంటివి) పుట్టలో వేసేటప్పుడు, పాములకు హాని కలగకుండా, పర్యావరణానికి ఇబ్బంది లేకుండా చూసుకోవడం ముఖ్యం. వీలైనంత వరకు దేవాలయాల్లోని నాగ ప్రతిమలకు పూజ చేయడం శ్రేయస్కరం. ఈ ఆచారాలు కేవలం నమ్మకాలు, సంప్రదాయాలపై ఆధారపడి ఉంటాయి.
