సార్వత్రిక ఎన్నికల్లో బీజేపీ నేతృత్వంలోని ఎన్డీయే గెలుపుతో మూడోసారి ప్రధానిగా నరేంద్రమోడీ రేపు ప్రమాణస్వీకారం చేయబోతున్నారు. 2014, 2019లో మాదిరిగా బీజేపీ ఈ సారి మ్యాజిక్‌ఫిగర్(272)ని బీజేపీ స్వతహాగా సాధించలేక,240 సీట్లు మాత్రమే సాధించగలిగింది.దీంతో కూటమిలోని తెలుగుదేశం పార్టీ,జనతాదళ్ యునైటెడ్(జేడీయూ), శివసేన కీలకంగా మారాయి. మొత్తం 543 ఎంపీ సీట్లలో ఎన్డీయేకి ప్రస్తుతం 293 ఎంపీల మద్దతు ఉంది .
ఇదిలా ఉంటే.. మోడీ 3.0 సర్కార్‌లో మిత్రపక్షాలకు బెర్తులు ఖరారైనట్లు వార్తలు వినిపిస్తున్నాయి. ప్రస్తుతం ఉన్న సమాచారం ప్రకారం.. చంద్రబాబు నాయుడు టీడీపికి 4 మంత్రిత్వ శాఖలు, నితీష్ కుమార్ జేడీయూకి 2 మంత్రిత్వ శాఖలు దక్కే అవకాశం దాదాపుగా ఖరారు అయినట్లు తెలుస్తోంది. ఇప్పటికే జేడీయూ నుంచి ఇద్దరు సీనియర్ నేతలైన రామ్‌నాథ్ ఠాకూర్ ,లాలన్ సింగ్ పేర్లను ప్రతిపాదించింది. ప్రస్తుతం తెలుగుదేశం పార్టీకి 16, జేడీయూకి 12 సీట్లు ఉన్నాయి.
