దేశవ్యాప్తంగా కరోనా వైరస్ సెకండ్ వేవ్ శరవేగంగా వ్యాప్తి చెందుతోంది. ఈ మేరకు కేంద్ర, రాష్ట్ర ప్రభుత్వాలు ప్రజలు టీకా వేసుకునేందుకు ఎన్నో ప్రయత్నాలు చేస్తున్నాయి. అయితే ప్రభుత్వ రంగ బ్యాంకు అయిన సెంట్రల్ బ్యాంక్ ఆఫ్ ఇండియా కోవిడ్ టీకా వేసుకోవడానికి ప్రోత్సహక ప్రత్యేక డిపాజిట్ పథకాన్ని ప్రారంభించింది. ఈ స్కీం ద్వారా బ్యాంకు వినియోగదారులు టీకా వేసుకున్నట్లయితే వారి ఫిక్స్‌డ్ డిపాజిట్ (ఎఫ్‌డీ) ఖాతాపై 0.25 శాతం అదనపు వడ్డీ పొందొచ్చు. ఈ స్కీం 1,111 రోజుల పాటు అందుబాటులో ఉంటుంది. సెంట్రల్ బ్యాంక్ ఆఫ్ ఇండియా ప్రారంభించిన ఈ కొత్త స్కీం పేరు ‘ఇమ్యూన్ ఇండియా డిపాజిట్ స్కీం’.
పరిమితి కాల పథకాన్ని బ్యాంకు కస్టమర్లు తప్పనిసరిగా సద్వినియోగం చేసుకోవాలని సెంట్రల్ బ్యాంక్ ఆఫ్ ఇండియా పేర్కొంది. ఈ స్కీంలో సీనియర్ సిటిజన్లు కూడా అర్హులుగా పరిగణించబడతారన్నారు. అయితే ఈ స్కీం అనేది మొదటి వ్యాక్సిన్ వేసుకున్న వారికి కూడా వర్తింపజేయడం జరుగుతుందన్నారు. ఇమ్యూన్ ఇండియా డిపాజిట్ స్కీం అనేది కేవలం సెంట్రల్ బ్యాంక్ ఆఫ్ ఇండియా వినియోగదారులకు మాత్రమే కేటాయించారు. బ్యాంకు తన కస్టమర్లకు కోవిడ్ సోకినప్పుడు ప్రోత్సాహకంగా ఈ స్కీంను ప్రవేశపెట్టింది. ఇమ్యూన్ ఇండియా డిపాజిట్ పథకం ద్వారా సెంట్రల్ బ్యాంక్ ఆఫ్ ఇండియా 1,111 రోజుల పాటు హెల్తీ సొసైటీ నిర్మించాలని ఈ పథకాన్ని ప్రవేశపెట్టింది.
ఈ పథకంలో కోవిడ్ టీకాలు వేసుకున్న వ్యక్తి స్థిర డిపాజిట్లపై 0.25 శాతం ఎక్కువ వడ్డీ లభిస్తుంది. ప్రస్తుతం సెంట్రల్ బ్యాంక్ ఆఫ్ ఇండియా మూడేళ్ల డిపాజిట్లపై 5.1 శాతం వడ్డీ కల్పిస్తుండగా.. ఈ స్కీంలో చేరిన వారికి 5.35 శాతం రాబడి అందిస్తోంది. అలాగే సీనియర్ సిటిజన్లు కూడా అదనపు వడ్డీ స్కీంకు అర్హులని బ్యాంకు తెలిపింది. టీకా డోస్ తీసుకున్న సీనియర్ సిటిజన్ల ఫిక్స్‌డ్ డిపాజిట్లపై 0.50 శాతం అదనపు వడ్డీ కల్పిస్తోంది.
