చావు ఒడిలో నుంచి తప్పించుకున్నాడు అని మనం సాధారణంగా అంటుంటాం. కానీ చనిపోయాడని అంత్యక్రియలకు సిద్ధం చేస్తున్న సమయంలో ఓ వ్యక్తి శరీరంలో కదలికలు వచ్చాయి. వెంటనే ఆస్పత్రికి తరలించగా వైద్యులు చికిత్స చేసి అతడిని మళ్లీ బతికించారు. ఈ ఘటన పంజాబ్‌ రాష్ట్రం లుథియానాలో చోటుచేసుకుంది. అసలేం జరిగిందంటే..?
పోలీసు అధికారి మన్‌ప్రీత్‌ను ఓ విషపురుగు కుట్టగా.. సెప్టెంబరు 15వ తేదీన ఆయన్ను లుథియానాలోని బస్సీ ఆసుపత్రిలో చేర్పించారు. శరీరమంతా ఇన్‌ఫెక్షన్ సోకడంతో వెంటిలేటరుపై ఉంచి వైద్యులు చికిత్స అందించారు. ఈ క్రమంలో సెప్టెంబర్‌ 18వ తేదీ అర్ధరాత్రి మన్‌ప్రీత్‌ మృతి చెందాడని ఆస్పత్రి సిబ్బంది తెలిపారని తండ్రి రామ్‌జీ చెప్పారు. మరుసటిరోజు ఉదయం పోస్ట్‌మార్టం కోసం తరలిస్తుండగా డ్యూటీలో ఉన్న ఓ పోలీసు అధికారి.. మన్‌ప్రీత్‌ శరీరంలో కదలికలను గుర్తించారు. వెంటనే మరో ఆసుపత్రికి తరలించి చికిత్స చేయగా ఆయన తిరికి బతికారని కుటుంబసభ్యులు తెలిపారు. కాగా, మన్‌ప్రీత్‌ చనిపోయాడని తమ సిబ్బంది ఎవరూ చెప్పలేదని బస్సీ ఆసుపత్రి వైద్యులు అంటున్నారు.
