దేశవ్యాప్తంగా సంచలనం సృష్టించిన ఉన్నావ్ అత్యాచార బాధితురాలి ఇంటికి ఈ కేసులో ఆరోపణలు ఎదుర్కొంటున్న ఇద్దరు వ్యక్తులు నిప్పు పెట్టారు. ఉత్తర్ ప్రదేశ్లో జరిగిన ఈ ఘటన తీవ్ర కలకలం రేపుతోంది. ఈ ఘటనలో బాధిత బాలిక కుమారుడు, చెల్లి తీవ్రంగా గాయపడ్డారు. అసలేం జరిగిదంటే..?
పోలీసుల కథనం ప్రకారం.. ఇటీవలే బెయిల్పై విడుదలైన ఉన్నావ్ అత్యాచార కేసు నిందితులు మరో ఐదుగురితో కలిసి బాధితురాలి ఇంటికి వెళ్లారు. అత్యాచారం కేసును వెనక్కి తీసుకోవాలని డిమాండ్ చేశారు. అందుకు బాధితురాలి కుటుంబ సభ్యులు అంగీకరించలేదు. ఈ నిరాకరణతో తీవ్ర ఆగ్రహంతో ఉన్న నిందితులు బాధితురాలిపై దాడి చేసి ఇంటికి నిప్పు పెట్టారు.
2022 ఫిబ్రవరి 13న అప్పటికి 11 ఏళ్ల వయసున్న బాలికపై అత్యాచారం జరగగా.. సెప్టెంబరు నెలలో ఆమె కుమారుడికి జన్మనిచ్చింది. ఆ చిన్నారిని అంతమొందించడానికే నిందితులు ఈ ఘాతుకానికి పాల్పడ్డారని బాలిక తల్లి ఆరోపించారు. బాధితురాలైన తమ కుమార్తెను అంతమొందించడానికే నిందితులు.. తమ ఇంటికి నిప్పు పెట్టారని బాధితురాలి తల్లి పోలీసులకు ఫిర్యాదు చేశారు.
