సార్వత్రిక ఎన్నికల సమరానికి భారతీయ జనతా పార్టీ సమాయత్తమవుతోంది. ముందుగానే పోటీ చేసే అభ్యర్థులను ఖరారు చేసిప్రత్యర్థి పార్టీలు తేరుకోకముందే ఎన్నికల ఫైట్లో ముందుండాలనుకుంటోంది. ఇందుకోసం 100 మంది అభ్యర్థులతో తొలి జాబితా శుక్రవారం ప్రకటించనున్నట్లు తెలుస్తోంది. తొలి జాబితాలోనే ప్రధాన మంత్రి నరేంద్ర మోడీ, కేంద్ర మంత్రులు అమిత్ షా, రాజ్నాత్సింగ్తోపాటు తెలంగాణకు చెందిన పలువురు అభ్యర్థుల పేర్లు ప్రకటించే ఛాన్స్ ఉంది.
సార్వత్రిక ఎన్నికల ఏర్పాట్ల కోసం గత కొద్ది రోజులుగా కేంద్ర ఎన్నికల సంఘం దేశ వ్యాప్తంగా పర్యటిస్తోంది. జమ్ముకశ్మీర్, లఢఖ్ మినహా అన్ని రాష్ట్రాలు, కేంద్ర పాలిత ప్రాంతాల్లో ఎన్నికల కమిషన్ పర్యటనలు ముగిశాయి. ఈ నేపథ్యంలో ఎప్పుడైనా ఎన్నికల షెడ్యూల్ విడుదల చేసే అవకాశం ఉంది. అంతకుముందే తొలి జాబితాను ప్రకటించి ఎన్నికల శంఖారావం పూరించాలని బీజేపీ భావిస్తోంది. ఇందుకోసం గురువారం రాత్రి 10.30 గంటల నుంచి శుక్రవారం తెల్లవారుజామున 4 గంటల వరకు ప్రధాన మోడీ ఆధ్వర్యంలోని బీజేపీ కేంద్ర ఎన్నికల కమిటీ లోక్సభ అభ్యర్థుల ఖరారుపై సమాలోచనలు చేసింది. ఈ సమావేశంలో బీజేపీ అధ్యక్షుడు జేపీ నడ్డా, హోం మంత్రి అమిత్ షా, రక్షణశాఖ మంత్రి రాజ్నాథ్ పాల్గొని చర్చలు జరిపారు. దాదాపు 16 రాష్ట్రాల నుంచి లోక్సభ అభ్యర్థుల పేర్లు చర్చించి ఖరారు చేసినట్లు సమాచారం.
తొలి జాబితాలో తెలంగాణ నేతలు
తెలంగాణ రాష్ట్రంలో 17 ఎంపీ స్థానాలున్నాయి. గత సార్వత్రిక ఎన్నికల సమయంలో భారతీయ జనతా పార్టీ నాలుగు స్థానాలను కైవసం చేసుకుంది. ఈ సారి అంతకంటే ఎక్కువ స్థానాల్లో విజయం సాధించి సత్తా చాటాలని చూస్తోంది. ఆదిలాబాద్, నిజామాబాద్, కరీంనగర్, సికింద్రాబాద్ నియోజకవర్గాల్లో దాదాపు సిట్టింగ్లకే అవకాశం ఉన్నట్లు తెలుస్తోంది. వారి పేర్లు తొలి జాబితాలో ప్రకటించే అవకాశం ఉన్నట్లు సమాచారం. ఆదిలాబాద్ నుంచి సోయం బాపూరావు, నిజామాబాద్ నుంచి ధర్మపురి అరవింద్, కరీంనగర్ నుంచి బండి సంజయ్, సికింద్రాబాద్ నుంచి కిషన్రెడ్డికి మరోసారి అవకాశం కల్పించనున్నారు.
