రాహుల్‌ కేరళ పర్యటనపై సీపీఎం విమర్శలు

కాంగ్రెస్ ఆధ్వర్యంలో ఆ పార్టీ అగ్రనేత రాహుల్ గాంధీ చేపట్టిన ‘భారత్ జోడో యాత్ర’పై సర్వత్రా విమర్శలు వెల్లువెత్తుతున్నాయి. యాత్రలో రాహుల్ ధరిస్తున్న దుస్తుల నుంచి ఆయన కలుస్తున్న వ్యక్తుల వరకు అన్నింటిపైనా విపక్ష, అధికార పక్షాలు ఓ కన్నేసి ఉంచాయి. ఈ క్రమంలోనే కాంగ్రెస్‌ పార్టీపై తీవ్ర విమర్శలు గుప్పిస్తున్నాయి. తాజాగా రాహుల్ ‘భారత్ జోడో యాత్ర’పై సీపీఎం విమర్శలు ఎక్కు పెట్టింది. బీజేపీ పాలిత రాష్ట్రమైన యూపీలో కేవలం 2 రోజులు మాత్రమే యాత్ర చేపట్టి.. కేరళలాంటి చిన్న రాష్ట్రంలో 18 రోజులు పాదయాత్రకు ప్రణాళిక సిద్ధం చేయడాన్ని తప్పుబట్టింది.

‘ఇది భారత్‌ జోడో యాత్ర కాదు.. సీటు జోడో యాత్ర’ అని సీపీఎం విమర్శించింది. దీనికి సంబంధించి ఆ పార్టీ అధికారిక ట్విటర్‌ ఖాతాలో ఓ క్యారికేచర్‌ను ఉంచి.. భాజపా-ఆరెస్సెస్‌పై పోరుకు అనుసరిస్తున్న వినూత్న విధానం అంటూ వ్యంగ్య బాణాలు సంధించింది.

సీపీఎం విమర్శలపై కాంగ్రెస్‌ పార్టీ స్పందించింది. యాత్రకు సంబంధించిన ప్రణాళికపై సరైన అవగాహన లేకుండా విమర్శలు చేస్తున్నారని ఆ పార్టీ నేతల జైరాం రమేశ్‌ మండిపడ్డారు. విమర్శలు చేసే ముందు దానిపై వర్క్‌ చేయాలని సూచించారు. దక్షిణ భారతంలో బీజేపీకి ఏ టీమ్‌గా వ్యవరిస్తున్న పార్టీ సిల్లీ విమర్శలు చేస్తోందంటూ తప్పుబట్టారు.

కేరళలోని వయనాడ్‌ నుంచి రాహుల్‌ ప్రస్తుతం ఎంపీగా వ్యవహరిస్తున్న సంగతి తెలిసిందే. ఈ నేపథ్యంలోనే ఆయన తన సీటును కాపాడుకునేందుకు రాష్ట్రంలో ఎక్కువ రోజులు యాత్ర చేస్తున్నారంటూ సీపీఎం విమర్శించగా.. కాంగ్రెస్‌ విమర్శల్ని తిప్పికొట్టింది. కేరళలో ఎప్పుడు ఎన్నికలు జరిగినా కాంగ్రెస్‌ నేతృత్వంలోని యూడీఎఫ్‌, సీపీఎం నేతృత్వంలోని ఎల్డీఎఫ్‌ మధ్యే ప్రధాన పోరు ఉంటుంది.