వచ్చే ఏడాది ఎన్నికలు జరగనున్న నేపథ్యంలో రాజస్థాన్ లో కాంగ్రెస్ ప్రభుత్వం ఇప్పుడే అప్రమత్తమైంది. ఓటర్లను ఇప్పటి నుంచే ఆకర్షించేందుకు ప్రణాళికలు సిద్ధం చేసింది. ఈ నేపథ్యంలో ఆ రాష్ట్రంలోని పేదలకు శుభవార్త చెప్పింది రాజస్థాన్లోని అశోక్ గహ్లోత్ ప్రభుత్వం. దారిద్య్ర రేఖకు దిగువన ఉన్నవారికి, ఉజ్వల యోజన లబ్ధిదారులకు రూ.500కే వంట గ్యాస్ సిలిండర్ అందిస్తామని ప్రకటించింది. 2023 ఏప్రిల్ 1 నుంచి ఈ నిర్ణయం వర్తిస్తుందని తెలిపింది. అర్హులైన కుటుంబాలకు ఏటా 12 సిలిండర్లు ఇలా తక్కువ ధరకే అందిస్తామని సీఎం అశోక్ గహ్లోత్ తెలిపారు. కాంగ్రెస్ పార్టీ మాజీ అధ్యక్షుడు రాహుల్ గాంధీ సమక్షంలో ఈ ప్రకటన చేశారు.
“బడ్జెట్ కోసం కసరత్తులు ప్రారంభించాం. ఇప్పుడైతే నేను ఒకటే చెప్పగలను. పేద ప్రజలకు రూ.500కే సిలిండర్లు ఇస్తాం. ఉజ్వల పథకం కింద ప్రజలకు మోదీ సర్కారు ఎల్పీజీ కనెక్షన్లు ఇచ్చింది. కానీ సిలిండర్ల ధర రూ.వెయ్యికి చేరింది. ఇప్పుడు అవన్నీ ఖాళీగా ఉన్నాయి.”
-అశోక్ గహ్లోత్, రాజస్థాన్ సీఎం
