బాలీవుడ్ స్టార్ హీరో సల్మాన్ ఖాన్ (సల్లూ భాయ్) హైదరాబాద్ చేరుకున్నారు. ఫర్హద్ సామ్‌జీ దర్శకత్వంలో వస్తున్న ‘కభీ ఈద్ కభీ దివాళీ’ సినిమా షూటింగ్ నేపథ్యంలో రామోజీ ఫిల్మ్ సిటీకి రానున్నారు. ఈ సినిమాలో స్టార్ హీరోయిన్ పూజాహెగ్డే నటిస్తున్నారు. ఈ సినిమా కోసం రామోజీ ఫిల్మ్ సిటీలో భారీ సెట్ ఏర్పాటు చేసినట్లు సమాచారం. ఈ సెట్‌లో సుమారు నెల రోజులపాటు షూటింగ్ జరుగుతుందని ఫిల్మ్ సర్కిల్ టాక్. అలాగే ఈ సినిమాలో టాలీవుడ్ స్టార్ హీరో వెంకటేశ్ కీలక పాత్రలో నటించనున్నారు. త్వరలో వెంకటేశ్ కూడా షూటింగ్‌లో జాయిన్ అవ్వనున్నట్లు సమాచారం.
అయితే సల్మాన్ ఖాన్ హైదరాబాద్ చేరుకోవడంతో.. పోలీసులు భారీ భద్రత ఏర్పాటు చేశారు. ఇటీవల గుర్తు తెలియని వ్యక్తి నుంచి బెదిరింపు లేఖలు వస్తున్నాయని సల్మాన్ ఖాన్ పోలీసులకు ఫిర్యాదు చేశారు. ఈ మేరకు పోలీసులు గ్యాంగ్‌స్టర్ లారెన్స్ బిష్ణోయ్‌ను అదుపులోకి తీసుకుని విచారణ చేపడుతున్నారు. ఈ నేపథ్యంలో భారీ భద్రత నడుమ షూటింగ్ జరగనున్నట్లు తెలుస్తోంది.
