సెప్టెంబరులో జరగాల్సిన నీట్, జేఈఈ పరీక్షలను వాయిదా వేయాలని సుప్రీంకోర్టును ఆశ్రయించాయి బిజేపియేతర పాలనలోని ఆరు రాష్ట్రాల ప్రభుత్వాలు. పరీక్షలు యథావిధిగా నిర్వహించాలని గతంలో ఇచ్చిన తీర్పును పునర్సమీక్షించాలని కోరాయి. ఈ మేరకు ఆరు రాష్ట్రాల మంత్రులు(బంగాల్ నుంచి మొలోయ్ ఘటక్, ఝార్ఖండ్ నుంచి రామేశ్వర్ ఒరాన్, రాజస్థాన్ నుంచి రఘు శర్మ, ఛత్తీస్గఢ్ నుంచి అమర్జీత్ భగత్, పంజాబ్ నుంచి బీఎస్ సిద్దు, మహారాష్ట్ర నుంచి ఉదయ్ రవీంద్ర సావంత్) సుప్రీంలో రివ్యూ పిటిషన్ దాఖలు చేశారు. నీట్, జేఈఈ పరీక్షలు షెడ్యూల్ ప్రకారమే నిర్వహించాలని ఆగస్టు 17న తీర్పునిచ్చింది సుప్రీంకోర్టు. కరోనా కారణంగా ఎంతో విలువైన ఏడాది కాలాన్ని విద్యార్థులు కోల్పోవడానికి వీల్లేదని తెలిపింది.నీట్, జేఈఈ వాయిదా కోసం న్యాయపోరాటం చేసే అంశంపై ఇటీవల బిజేపియేతర పార్టీల ముఖ్యమంత్రుల సమావేశంలో చర్చ జరిగింది.
కళాశాలలు, వర్సటీల చివరి సంవతర్సం పరీక్షల నిర్వహణపై తీర్పు వెలువరించింది సుప్రీం కోర్టు. సెప్టెంబర్ 30 లోపు పరీక్షలు నిర్వహించకుండా రాష్ట్రాలు, వర్సటీలు విద్యార్థులను ప్రమోట్ చేయొద్దని స్పష్టం చేసింది. ఫైనల్ ఇయర్ పరీక్షలు నిర్వహించాలన్న యూనియన్ గ్రాంట్స్ కమిషన్ (యూజీసీ) నిర్ణయాన్ని సమర్థించింది జస్టిస్ అశోక్ భూషణ్ నేతృత్వంలోని ధర్మాసం. ఏదైన రాష్ట్రం పరీక్షలు నిర్వహించేందుకు ఇబ్బందులు ఉంటే.. గడువు పెంచాలని యూజీసీని సంప్రదించాలని సూచించింది. కరోనా మహమ్మారి విజృంభిస్తున్న తరణంలో పరీక్షలు నిర్వహించాలని యూజీసీ నిర్ణయించటాన్ని సవాల్ చేస్తూ.. శివసేన యూత్ వింగ్ యువ సేనాతో పాటు పలువురు సుప్రీం కోర్టును ఆశ్రయించారు.
