భారత యువ గ్రాండ్ మాస్టర్ ప్రజ్ఞానంద అంతర్జాతీయ టోర్నీలో చెలరేగిపోతున్నాడు. నార్వే చెస్‌ టోర్నీలో ఈ సంచలన ఆటగాడు తగ్గేదేలే అంటూ దూసుకెళ్తున్నాడు. ఇటీవల మూడో రౌండ్లో ప్రపంచ నంబర్‌వన్‌ కార్ల్‌సన్‌కు ఓటమి రుచి చూపించిన ఈ యువ గ్రాండ్‌మాస్టర్‌.. తాజాగా అయిదో రౌండ్లో ప్రపంచ రెండో ర్యాంకర్‌ ఫాబియానో కరువానా (అమెరికా)పై విజయం సాధించాడు. ఓ క్లాసికల్‌ చెస్‌ టోర్నీలో ప్రపంచ టాప్‌-2 ర్యాంకర్లను ప్రజ్ఞానంద తొలిసారి ఓడించాడు.
ఆఖర్లో కరువానాతో గేమ్‌ డ్రాగా ముగిసేలా కనిపించింది. కానీ 66వ ఎత్తులో కరువానా తప్పిదాన్ని తనకు అనుకూలంగా మార్చుకున్నాడు ప్రజ్ఞానంద. అలా మరో 11 ఎత్తుల్లోనే విజయాన్ని అందుకున్నాడు. ఈ గెలుపుతో ప్రపంచ ర్యాంకింగ్స్‌లో ప్రజ్ఞానంద టాప్‌-10లోకి వచ్చాడు. ప్రత్యక్ష ర్యాంకింగ్స్‌లో 2754.7 ఎలో రేటింగ్‌ పాయింట్లతో పదో స్థానంలో నిలిచాడు. అయిదు రౌండ్లు పూర్తయేసరికి నకముర (10), కార్ల్‌సన్‌ (9), ప్రజ్ఞానంద (8.5) వరుసగా తొలి మూడు స్థానాల్లో నిలిచారు.
